ЕКІ ЕЛ БАУЫРЛАСТЫҒЫ

Елді ояту үшін, тарихты ояту керек. Осы ұлағатты сөзіміздің негізінде үшінші мегополисте “Қазақстан мен Өзбекстан тарихын зерттеудің өзекті мәселелері” атты тақырыпта халықаралық ғылыми-тәжірибелік конференция өтті. Екі күнге жалғасатын іс-шарада ел тарихы үшін ертең болатын маңызды мәселелер мен құжаттар талқыланатын болады. 2024 жылдың 5-6 маусымында Шымкент қаласының Мәдениет, тілдерді дамыту және архивтер басқармасының ұйымдастыруымен, Қазақстан Республикасы Мәдениет және ақпарат министрлігінің Архив, құжаттама және кітап ісі комитетімен бірлесіп, Өзбекстан Республикасы архивтерінің Қазақстан Республикасындағы күндері өтеді. Ғылыми конференцияны ашып берген қала әкімінің орынбасары, бауырлас ағайынға алғысын білдіріп, тарихтың жаңа беттерін ашу, болашақ ұрпақ үшін маңызы зор екенін атап өтті.
Жиын аясында «Қазақстан мен Өзбекстан тарихы зерттеуінің өзекті мәселелері» тақырыбында халықаралық ғылыми-тәжірибелік конференция, «Қазақстан мен Өзбекстан: екі ел арасындағы архив саласын дамыту аспектілері атты дөңгелек үстел ұйымдастырылған. Іс-шараның мақсаты: Қазақстан Республикасы Мәдениет және Ақпарат министрлігінің Архив, құжаттама және кітап ісі комитеті мен Өзбекстан Республикасы Әділет министрлігі жанындағы «Узархив» агенттігінің 2023-2026 жылдарға арналған мәдени-гуманитарлық ынтымақтастықты одан әрі дамыту туралы келісімдерді іске асыруды қамтамасыз ету жөніндегі практикалық іс-шаралар жоспарының 2-тармағын жүзеге асыру, архив ісі бойынша екі ел арасындағы ынтымақтастықты дамытып, архивтерді дамытудың инновациялық идеяларын қалыптастыру, іс-тәжірибемен алмасу болып табылады.
Шара аясында өзбек халқы елімізге жүзге тарта құнды жәдігерлер алып келген. Ата-бабамыздың басынан өткен оқиғалар тарихы көрмеге қойылып, қонақтарға ұсынылды.
Конференция жұмысы Қазақстан Республикасы мен Өзбекстан Республикасының архивтерінде сақталған құжаттар бойынша көрмелердің тұсау кесері, конференцияның пленарлық бөлімі, секциялық жұмыстар, тарихты зерттеудегі архив құжаттарының орны мен рөлі, архив саласы: жағдайы және даму перспективалары, архивтік құжаттардың сақталуын қамтамасыз етудің заманауи технологиялары бағыттарын қамтиды.