Шымкенттегі балалар темір жолы жаңа демалыс орнына айналмақ. Шаһар басшысы Ғ.Сыздықбеков 8 шақырымды алып жатқан балалар темір жолын жаяу аралап, жаңа серуен аймағының тұжырымдамасын таныстырды. Ағаштары бүлініп, жолдары кедір-бұдыр болып, қараусыз қалған аумақ енді заманауи үлгідегі серуен аймағы ретінде пайдалануға беріледі.
Қала әкімі Ғ.Сыздықбеков балалар темір жолының жай күйімен танысты. Дендросаябақ пен Қажымұқан стансасы аралығындағы 8 шақырымды қамтитын темір жол локомотиві 1979 жылы сол кездегі Облыс басшысы Асанбай Асқаровтың тікелей басқаруымен салынған. Бұған дейін қайта жаңғырту жұмыстары да жүргізілген. Дегенмен шаһар басшысы жаңарту жұмыстарына қарағанда кәсіпкерлердің демеушілігімен қайта салу әлде қайда тиімді екенін ескерді.
Балалар темір жолын жаяу аралаған қала әкімі айналаны қоқыстан тазартып, бірқатар кемшіліктерді ескеруді тапсырды. Кәсіпкерлердің демеушілігімен қайта салу жұмыстары басталып кетті. Жобаға сәйкес веложол, жүгіру жолдары, бірнеше воркаут алаңдары салынып, жан жағы көгалдандырылады.
Арғынбеков-Бәйдібек би жол айрығын салу кезінде темір жолдың бір бөлігі бұзылғанын ескерген қала басшысы жауаптыларға жаяу жүргіншілер жолын ыңғайлы етіп салуды тапсырды. Сонымен қатар қала тұрғынының ұсынысын тыңдап, сауалына жауап берді.
Ал, екі станса орны кәсіпкерлерге беріліп, ескі локомотив естелік ретінде сақталады. Демеушілер тарапынан қайта салынатын жаңа серуен аймағы халықтың сүйікті аумағына айналмақ. Жалпы, қалада шешілмеген мәселелер көп. Көпқабатты үйлердегі ыстық су, ауыз су, ирригация және канализация жүргізілмеген аудандар жетерлік. Қала әкімі бюджет қаражатын осындай халыққа аса қажет жобаларға жұмсайтынын айтты. Айта кетейік жаңа серуен аймағы Халықаралық балаларды қорғау күніне дейін қолданысқа берілмек.
Сонымен қатар мегаполис басшысы Тәуке хан даңғылындағы жаяу жүргіншілер тротуарларының жағдайымен танысты. Қала тұрғындары қыс мезгілінде тротуар плиталарының қозғалысқа қауіптілігіне бірнеше рет шағымданған.
Тұрғындардың шағымдарын ескере отырып, сауалнама жүргізілді. Сауалнамаға қатысқандардың 90%-ы тротуар плиталарын асфальт төсемімен ауыстыруды қолдаған. Осыған байланысты қала әкімі жаяу жүргіншілерге арналған тротуарды асфальттеу бойынша шешім қабылдады.
