Ұлы дала әуендері мен шежіресі Шымкент төрінде шырқалды. Дәстүрлі ән орындаушылар мен термешілердің байқауы республикалық деңгейде өтті. 40-қа жуық өнерпаз көнеден сақталып келе жатқан халық әндерін қайта жаңғыртып, тыңдаушысын әсем де әуезді үнімен баурады.
«Түркістан сарайында» Шымкент қаласы әкімдігінің ұйымдастыруымен «Ұлы дала әуендері» дәстүрлі ән орындаушылар және «Ұлы дала шежіресі» термешілердің республикалық байқауы өтті. Іс-шараның мақсаты – халық арасында жалпы ұлттық дәстүрлі өнерімізді насихаттай отырып, оңтүстік өңірінің дәстүрлі әндеріне ерекше көңіл бөлу, өскелең ұрпақтың санасына сіңіру.
Дәстүрлі ән орындаушылар және термешілердің байқауына 17-35 жас аралығындағы өнерпаздар қатысып, бақ сынады. Көне сарынмен әуелеткен өнерпаздар орындау шеберлігі, образ байлығы, сахна мәдениеті, киім үлгісі сияқты ерекшеліктерімен бағаланды. Қазылар алқасының құрамында белгілі өнерпаздар Мейрамбек Беспаев, Жанар Айжанова, Кенжебай Шал, ақын Қалқаман Сарин және тағы басқалар әділ бағасын беріп, үздіктерді анықтады.
Сонымен, дәстүрлі ән орындаушылар бас жүлде, 1,2,3-орындармен қатар, ынталандыру сыйлықтарымен марапатталды. Сондай-ақ, терме сайысының жеңімпаздары да бас жүлде, 1,2,3-орындармен қатар Майлықожа Сұлтанқожаұлы, Құлыншақ Кемелұлы, Қайыпназар Әйтпенов, Камал Ендібаев атындағы номинацияларына ие болды.
Шымкент қаласы әкімінің бірінші орынбасары Қуаныш Асылов жеңімпаздарды құттықтап, бүгін дәстүрлі өнеріміз төрге озғанын, өңіріміздің байырғы қоңыр саздары қайта жаңғырғанын атап өтті.
Ұлттық өнер – ұрпаққа аманат. Табиғи талантын әнге қосқан қатысушылар тарихтан жеткен өнерді жаңғыртып, оңтүстіктің дәстүрлі әндерін шырқау арқылы көрерменнің ыстық ықыласы мен қошеметіне бөленді.
