Әлеуметтік инфрақұрылым, халықтың зарына айналған заңдастырылмаған жерлер, сапасыз байланыс, қаланың бас жоспарына көңіл толмау, ұн бағасының көтерілуі сынды толассыз мәселелер. Қала басшысының Абай ауданының халқымен кездесуінде айтылған жағдайлардың бір парасы осылай. Бұл мәселе, әрине, ертеден келе жатыр. Бірақ, жаңа әкімге үміт артып, бір өзгерісті күтіп отырған халық ағынан ақтарылып, дертін айтты. Бүкпесіз әңгімені тыңдаған әкім кей әріптестері үшін кешірім де сұрады. Кездесу 3 сағат 45 минутқа созылды.
Кездесудің басы Ғабит Сыздықбековтің халықпен сәлемдесіп, аудан әкімінің аймақта атқарылған жұмыстар мен алдағы жоспарларын баяндаумен басталды. 15 минуттық баяндамадан соң, тәртіп бойынша сұрақ-жауапқа көштік. Залдың екі тұсындағы қос микрофонға қарай ұмтылғандар көп. Тұрғындар бас мәселесімен емес, тұралап қалған, осыған дейінгі талай жүздесуде айтылған тақырыптарды қайта көтерді. Уәде берген жауаптылардан көңілі қалса да, жаңадан тағайындалған жаңа Қазақстанның ашықтыққа әзір әкіміне сенім артып келіп отырғандар. Соның алғашқысы әкімнің ауысуына, тағы бір ауданның құрылуына халық кінәлі емес деген қайнарбұлақтықтардың сансыз мәселесі.
Бәріміз халықтың ортасында өстік. Проблемалардан хабардармын деген Ғабит Әбдімажитұлы жұмыстың жоспарға сай жүретінін, егер ол орындалмай жатса жауап беруге әзір. Ал, қаладағы кейбір саланың жұмысын әлі толық зерделемегендіктен, білмейтінін ашып айтып, назарына алды. Тәуелсіздікке 20 жыл тұрғын алабы. Аталған жердің жұртын жер мәселесі алаңдатып отыр. Қалталылардың қанауында қалдық деген уәжге аудан әкімі жауап берді.
Нұршуақ мөлтек ауданының тұрғыны ауылдағы мәселені жазсам кітап бетіне сыймас деп, астарлы әзілмен өркениеттен кенжелеп қалған Нұршуықтың проблемасын тізіп шықты. Сайлау алды кездесуде халыққа уәдесін берген, депутаттық мандатын иеленген халық қалаулысынан Күншуақ тұрғын алабының көңілі қалып отыр.
Қаланың негізгі көшелерін көріп көңіл марқаяды. Бірақ, шеткері шықсаң ойдым-ойдым жол жүйкені жұқартқаны былай тұрсын, зардабы адамға да көлікке де тиюде деген тұрғындар айналып келіп ішкі көшені әсемдей бермей, қала маңына да бір зер салса деп отыр.
Бұл сауалға жауапты басқармалар өз жауабын берді. Өз кезегінде әкім сіздердің жүйелі жұмыс жүргізбегендіктеріңізден осы сұрақ туындап отыр деп, басшыларға назар салды. Ақ жағалылардың бірі тұрғындармен тілдесуде Абай ауданына қарасты көшенің маңызы бар ма, жоқ па деп бөлік-жарыпты. Ғабит Әбдімәжитұлы ол әріптесі үшін кешірім сұрады. Кездесуде заңсыз жер мен құжаты болса да заңдастыра алмай, әлекке түскен тұрғындар көмек сұрады. Бүгінгі күн тәртібінде басты орында тұрған ұн мен нанның қымбаттауы да халықты алаңдатып отыр.
Министр Мусин интернет жылдамдығын Жапониямен салыстырғанда таңырқағанымыз жасырын емес. Сенгендіктен емес, сенімсіздіктен. Оның қарапайым дәлелін мегаполистен-ақ білуге болады. Ауданға қарасты шағын аудандар, тұрғын алаптар, бәрі де байланыстың шырмауына байланып, цифровизацияның мүмкіндіктерінен мақұрым қалуда.
Мұңын айта-айта шаршаған тұрғындардың алды бас қалаға барған, бірі Президентке хат жазған. Көзі ашық, көкірегі ояу халық Мемлекет басшысының тапсырмасын назарға алып, ақ жағалыларға күйімізді көру үшін елдімекендерді жаяу аралап көріңіздер деп ұсыныс айтты.
Шаһардағы негізгі мәселе – транстпорт пен әлеуметтік инфрақұрылымда. 50-ден аса азаматтың талап, арызын тыңдаған әкім істің өзгеретінін, тек жақсы жаққа қарай өзгеретінін айтты. Сұрақ қою алаңына шыққан халықтың көптігінен-ақ проблеманың қаншалықты мол екенін аңғарасың. Ғабит Сыздықбеков көтерілген тақырыптарды түртіп алып, басым бөлігіне басқарма басшыларымен бірлесе отырып жауап берді. Сөзбен қатар істің адамымын деген әкім уақыт беруді сұрап, кездесуді қорытындылады.