Кәсіподақ – азаматтардың өз құқығын қорғай алуы, күш біріктіруі, әр адамның өз еркімен құратын ұйымы. Шымкент қаласына іссапармен келген Кәсіподақтар федерациясының төрағасы Сатыбалды Дәулеталин алда әлі де атқаратын жұмыс көп екенін айтады. Ендігі ретте бастауыш ұйым төрағалары ақпараттық-түсіндірме жұмыстарын күшейту бойынша, үйлестіру кеңесі мүшелерімен кездесіп, пікір алмасты.
Жиынға «Шымкент қаласы кәсіподақтар орталығы» аумақтық кәсіподақтар бірлестігінің төрағасы Бауыржан Әлтеев, салалық кәсіподақтар филиалдары мен жергілікті кәсіподақ төрағалары қатысты.
Бүгінде Аумақтық Кәсіподақтар Бірлестігінің құрамында 8 салалық кәсіподақ филиалдары және 7 жергілікті кәсіподақ бар. Жалпы 313 бастауыш кәсіподақ ұйымы жұмыс істейді. Іс-шарада кәсіподақтар жұмысын жандыру, жұмысшылардың құқығын қорғау мәселелері талқыланып, ұсыныстар айтылды.