«НҰРСӘТ» ӨНЕР МЕКТЕБІНІҢ ЖАЗҒЫ ЖҰМЫСЫ

Жаз мезгілінде балалардың бос уақытын тиімді пайдалану маңызды. Бұл тұста «Нұрсат» өнер мектебі бүлдіршіндерді 20 түрлі үйірмемен қызықтыра отырып, оларға сапалы уақыт өткізуге септігін тигізуде. Жыл 12 ай балалармен жұмыс жасайтын мекеме әлі де өнерлі, дарынды балаларды қабылдауға дайын. Мұнда тегін үйірмелер де бар.
Ұрпақ тәрбиесі — баршаның міндеті. Тәрбие тек сабаққа қатысумен ғана шектелмейді, сонымен қатар сабақтан тыс уақытта да жалғаса береді. Оқушының бос уақытын тиімді өткізу мен балаға жақсы тәрбие беруде мектептен тыс жұмыстардың алатын орны ерекше. Бұл тұста ата-анамен қатар, қоғамға да жауапкершілік жүктеледі. Шымкент қаласындағы «Нұрсат» өнер мектебі жаз мезгілінде балалардың әрі демалып, әрі сүйікті ісімен айналысуына мүмкіндік жасаған. Қаланың әкімшілік іскерлік аумағында орналасқан ғимарат 2021 жылы бой көтеріп, бүгінде 600 бала өз өнерін шыңдауда. Мұнда шығармашылық бағыттан бөлек, спорт үйірмелері де жұмыс жасайды. Каратэшілер жаттығуды тоқтатпай жақында республикалық жарысқа қатысып келді.
«Нұрсат» өнер ордасына мектеп жасындағы барлық балалар келіп, түрлі үйірмелерге қатыса алады. Мұнда тіпті екі-үш бағытты қоса алып жүрген оқушылар да бар екен. Ән мен би, сурет пен хип-хоп. Бұл бүлдіршіндердің өз таңдауы. Сондай-ақ мектеп ұстаздары жаңадан келген өнерге қызығушы балалардың өзіне ұнайтын бағытын таңдауына да көмек береді.
Нәзіктік пен тыныштықты жаны қалайтын қыздардың көбі тігіншілік, дизайнерлік бағытты таңдайды. Ине мен жіп ұстап, пішіп тігудің шебері болған бұрымдылар тіпті мектеп сахнасына қажетті киімдерді де дайындап бере алады. «Нұрсат» өнер мектебінде тек балаларға ғана көңіл бөлінбейді, сонымен қатар, ата-анамен де тығыз байланыс орнатылып тұрады. Негізгі мақсат — ата-ана мен бала арасындағы қарым-қатынасты нығайту, жақындастыру. Мәселен бүгін суретші оқушылардың аналарына тәжірибелік сабақ ұйымдастырылып, Олар да ұл-қыздарымен бірге сурет салып көрді. Ең бастысы ана мен бала қуанышты. Мұндай іс-шаралар мектеп қабырғасында әр түрлі бағытта апта сайын өткізіліп тұрады.
Мектеп өмірінде ұстаз — басты тұлға. Оқушының білімді болуы да осы мұғалімге байланысты. «Нұрсат» өнер мектебінде тек тек білікті, жоғары санатты, елімізге танымал тәжірибелі ұстаздар жұмыс жасайды. Осындай мамандардан балаңыздың білім алғанын қаласаңыз, балаңыз жаз мезгілінде уақытын тиімді өткізсін десеңіз онда «Нұрсат» өнер мектебіне келіңізде. Бүгінде қабылдау жүруде. Ақылы және тегін үйірмелер жұмыс жасауда.

Айғақ-ақпарат