Бүгін Мемлекет басшысы Қасым-Жомарт Тоқаев ақпарат саласының үздіктерін мерекемен құттықтап, марапат табыстады.
Мемлекет басшысының 2023 жылғы 27 маусымдағы өкімімен:
Қазақстан Республикасы Президентінің бұқаралық ақпарат құралдары саласындағы сыйлықтары:
— «31 арна» телеарнасының тілшісі Әлімжанова Ирина Советжанқызына;
— «Оңтүстік Қазақстан» газетінің бас редакторы Балажан Абайға;
— «Казахстанская правда» газетінің тілшісі Вологодская Галина Юрьевнаға берілді.
Қазақстан Республикасы Президентінің бұқаралық ақпарат құралдары саласындағы гранттары:
— «Orda. kz» ақпарат порталының тілшісі Астахов Илья Дмитриевичке;
— «Хабар 24» телеарнасының тілшісі Балтабаев Әділ Серікұлына;
— «Tengrinews. kz» ақпарат порталының тілшісі Дүйсенғұлова Рабиға Табиғатқызына;
— «Qazaqstan» телеарнасы ақпараттық-сараптамалық дирекциясы директорының орынбасары Омаш Саламатқа тапсырылды.
Қазақстан Республикасы Президентінің бұқаралық ақпарат құралдары саласындағы Алғысы:
— «Время» газетінің шығармашылық ұжымына;
— «Қызылжар-Ақпарат» ЖШС-ның шығармашылық ұжымына;
— «Kaztag» ақпарат агенттігінің шығармашылық ұжымына;
— «TDK-42» телеарнасының шығармашылық ұжымына жарияланды.
Сондай-ақ, Президент:
«Халқымыз «Кемедегінің жаны бір» дейді. Біздің Қазақстаннан басқа Отанымыз жоқ. Еліміздің өсіп-өркендеуі тек Үкіметке немесе жалпы билікке байланысты емес. Мемлекетіміздің дамуына әр азаматтың үлес қосуы аса маңызды. Бұл – өте қарапайым әрі өзекті формула.
Сондықтан тілші қауымның да, қатардағы азаматтың да, Президенттің де мақсаты – ортақ, мүддесі – бір деп ойлаймын. Бұл – тәуелсіздігімізді нығайту, елімізді көркейту. Осы міндетті жүзеге асыру үшін елімізге адал еңбек ету – парыз»,-деп ақпарат саласының майталмандарына шығармашылық табыс тіледі.