Қала тұрғындары үшін «Денсаулық» спорт кешенінің жүзу бассейні ашылды. 1970 жылы қолданысқа берілген, Спартак атымен танылған бассейн қазір Оңтүстік Қазақстан университетінің еншісінде. Балалар күні қарсаңында ашылған бассейнде бүгін жасөспірімдердің республикалық олимпиадасы өтіп жатыр. Ашық аспан астындағы суда жүзуден жарысатын 368 спортшыға қала басшысы Мұрат Әйтенов сәттілік тіледі.
Шымкент қаласы тұрғындарының салауатты өмір салтын ұстануына, спортшылардың шеберліктерін шыңдауына ықпал еткен М.Әуезов атындағы оқу ордасының «Денсаулық» спорт кешені толығымен модернизациядан өтті. Осыған байланысты оқу ордасының жүзу бассейнінде 1-ші маусым Халықаралық балалар күніне орай жас өрендердің республикалық турнирі өтті.
Республикалық турнирге еліміздің 16 облыс-қаласынан 368 спортшы қатысты. 2011 жылы туған және одан кіші жасөспірімдер санаты бойынша 20 командаға бөлініп, бәсекеге түсті. Ақтөбе облысының 12 жасар спортшысы Әсемай Сердәлі 5 жасынан бастап жүзуге қатысса, қазір еліміздің әр аймағындағы додаларда бақ сынап жүр екен. Спорт кешені ашылуының басты мақсаттарының бірі – университетте «Спорттық менеджмент, жүзу және нұсқаушы ісі» атты жаңа білім мамандығы ашылған. Жаңа мамандардың теория мен практиканы ұштастыруына спорт кешенінің рөлі айрықша болмақ.
Халыққа кеңінен танымал спорт кешенінің жүзу бассейні көлемі жағынан олимпиадалық стандарттарға сай, ашық аспан астында орналасқан. Алдағы уақытта жүзу бассейні тұрғындарда салауатты өмір салтын қалыптастыру және бұқаралық спортты дамыту мақсатында университет студенттері мен қала тұрғындары үшін жыл бойы жұмыс істейтін болады.
