Түркістан облыстық мәслихатының депутаты, “Amanat” партиясының мүшесі Дулат Әбіштің кезекті көшпелі қоғамдық қабылдауы Бөржар ауылдық округіне қарасты Ұялыжар ауылында өтті.
Әлеуметтік желіге жарияланған хабарландырудың ізімен кездесуге келген халықтың саны көп. Бірі әлеуметтік саланы, бірі туризмді, енді бірі ауыл шаруашылығы бойынша түйіні тарқатылмаған тақырыптарды қозғады. Қабылдауға сондай-ақ, билік партиясының Ордабасы ауданындағы филиалының төрағасы Әлиасқар Бердімұрат, аудандық мәслихат депутаты Асан Құрымбек, округ әкімі мен бірнеше бөлімнің мамандары қатысты.
Сонымен, кездесуде көтерілген негізгі мәселелерге мәселеге тоқталсақ. Ынтымақ елдімекенінің тұрғыны Сейіт Оспанов ауылдағы мектептің жайына қозғады. 2020 жылы Ынтымақ ауылынан 200 орынға арналған мектептің құрылысы басталмақ болған. Бірақ, үш жыл өтсе де қазығы қағылмады. Тұтастай ел қуана күтіп жүрген жаңа білім ұясы салынбақ тұрмақ, дайындаған құжаттың мерзімі аяқталуға жақын екен. Бірнеше миллионға жасатқан жобалық-сметалық құжаттың да уақыты аяқталуға жақын. Білім мен құрылысқа жауапты мамандардан мардымды әрекет болмағандықтан, тұрғындар Ұялыжар ауылында өткен көшпелі қабылдауда депутатқа мәселесін айтты.
Сұлтан Ысқақов атындағы оқу ошағының мәселесі осыған дейін де айтылып келген. Шешімін таппаған соң ауыл тұрғындары облыс депутататына арыз жазып, жас ұрпақтың жайлы мектепте білім алуына ықпал етуін сұрады. Елдің болашағы саналатын маңызды мәселеге депутат көңіл бөліп, тиісті басқармаларға сауал жолдайтынын айтты.
Сондай-ақ, ауыл азаматтары спорт саласына көңіл бөлінсе дейді. Шынығу кешенінің жоғын айтқан ел жанашыры қажет болса өзімнің жерімді берер едім деді Жарас Қойланұлы.
Әлем, Азия чемпиондары шыққан 8 ауылдан тұратын округтің орталығындағы спорт нысаны мәдениет үйінің бір бөлігінде жан сауғалап, аты бар, арнайы орны жоқ жерде шынығуда. Көк байрағымызды биікке көтеретін ұландарға спорт кешенін салу туралы ұсыныс жерде қалмады. Жауапты мамандармен бірлесе жоба жасап, тиісті комиссияға ұсынылатын болды.
Ұялыжардағы ең үлкен мәселенің бірі — жер дауы, су мәселесі. Келген азаматтардың басым бөлігі осы тақырыпты қозғады.
Жайылымнан тарыққан шаруалар нысаналы мақсатына қолданылмай, жекенің қолына өтіп, бос жатқан жерлерді халыққа берсе дейді. Елімізде бос жатқан жерлерді мемлекетке қайтару бойынша жұмыс жүріп жатыр. Дегенмен, оның да өз заңдылықтары бар деген Ордабасы аудандық ауыл шаруашылығы және жер қатынастары бөлімінің жер саласы бойынша сектор меңгерушісі Руслан Бисейтов тұрғындарға түсіндіріп берді.
Көшпелі қабылдауда сондай-ақ, туризм саласын жандандыруға бет бұрып, ісін бастап жатқан кәсіпкерлер мен балық шаруашылығын өркендетпек болған шаруалар келді. Олар, мемлекеттен жеңілдетілген пайызбен несие берсе дейді.
Қабылдау соңында облыстық мәслихат депутаты тұрғындар тарапынан айтылған өтініштер мен ұсыныстардың жүзеге асырылуын өз бақылауына алып, заң аясында тиісті мекемелерге хат жазуға, мәселелердің оң шешілуіне ықпал жасайтынын айтты.
