Ағымдағы жылдың 26 қарашасында Қазақстан Президенті Қасым-Жомарт Тоқаев «Астана, Алматы, Шымкент қалаларының және облыстардың әкімдері туралы» Жарлыққа қол қойған болатын.
«Астана, Алматы, Шымкент қалаларының және облыстардың әкімдері тиісті әкімдер тағайындалғанға дейін өз міндеттерін атқаратын болсын», — делінген Жарлықта.
Ал, бүгін ҚР Президенті Қасым-Жомарт Тоқаевтың Жарлығымен Мұрат Әйтенов Шымкент қаласының әкімі лауазымына қайта тағайындалды.
Жиында ҚР Президент әкімшілігі басшысының орынбасары Мәлік Мырзалин Конституцияның жаңа нормаларына сәйкес өңір әкімдерін тағайындаудың өзгертілген тәртібі енгізілгенін атап өтті.
Осыған орай, Мемлекет басшысы қалалық мәслихат қарауына 2 қандидатты ұсынды. Депутаттар өз таңдауын жасап, қала әкімі лауазымының кандидатурасына келісімін берді.
–Мемлекет басшысының бастамаларын қолдағандарыңыз үшін алғыс айтамын. Қала әкімі болып қайта тағайындалған Мұрат Дүйсенбекұлына Мемлекет басшысы алға қойған міндеттерді іске асыруда табыс тілеймін. Сіз халық пен Президенттің сенімін ақтауға барлық білім мен тәжірибеңізді жұмсайсыз деп білеміз. Өз еңбегіңіз арқылы Шымкент қаласының өркендеуі мен дамуына үлкен үлес қосатыныңызға сенімдіміз, – деді ҚР Президент әкімшілігі басшысының орынбасары Мәлік Мырзалин.
Өз кезегінде М.Әйтенов сенім білдіріп, ары қарай да жұмыс атқаруға мүмкіндік берген Президент Қ.Тоқаевқа және халық қалаулыларына алғысын жеткізді.
–Үлкен жауапкершілік жүктеп отырсыздар. Үміт пен сенімдеріңізді ақтауға тырысамын. Шымкенттің дамуында білімім мен күш-жігерімді барынша жұмсай отырып, өздеріңізбен бірлесе жұмысты ары қарай да жалғастыратын боламыз, – деді ол.
Мемлекет басшысы Мұрат Дүйсенбекұлын миллион тұрғыны бар үшінші мегаполисті әрі қарай басқаруына сенім артып отыр. Біз де өз кезегімізде Әйтеновке Шымкент қаласын одан әрі өркендету жолында табсытар тілейміз
