Шымкентте алғаш рет эпилепсиямен ауыратын науқастарға ота жасалды. Қалалық балалар клиникалық ауруханасына ресейлік және отандық білікті дәрігерлер келіп, тәжірибесімен бөлісті. Бұл операцияның жасалу барысы еліміздің барлық аумағынан жиналған 30-ға жуық дәрігердің біліктілігін арттыруға мүмкіндік жасамақ. Шымкенттегі қалалық балалар клиникалық ауруханасы технологиялық қызмет сапасын арттыру мақсатында шет елдік дәрігерлердің қатысуымен «Балалар нейрохирургиясындағы операцияның инновациялық әдістері» тақырыбында ғылыми конференция ұйымдастырды. Шеберлік сабағына еліміздің әр аймағынан тәжірибелі дәрігерлер қатысып, кәсіби мамандардың баяндамасын тыңдады. Бірнеше күнге жалғасатын мастер-класста Ресейлік және отандық дәрігерлер орталық жүйке жүйесінің туа біткен ақаулары, краниостеноз-синостоз, Арнольда Киари , Церебральды сал ауруына шалдыққан науқастарға бірнеше күрделі операция жасайды.
Бұл шеберлік сабағының негізгі мақсаты — қалалық балалар клиникалық ауруханасындағы нейрохирургиялық қызметті жоғары деңгейде дамытып, дәрігерлердің кәсіби біліктілігін арттыру. Адам өмірінің арашасы болатын мамандар үшін мұндай шеберлік сабақтарының маңызы жоғары.
Шымкент қалалық балалар клиникалық ауруханасы алға қойған басым бағыттар бойынша бірнеше мастер-класстар өткізген. Нәтижесінде, аталған ауруханада алғашқы рет сколиоз ауруына шалдыққан науқасқа күрделі ота жасалды.. Сондай-ақ нейрохирургиялық жолмен бас сүйегіне бірегей ота жасады. Тәжірбие алмасу операциясына Қызылорда, Ақтөбе, Орал, Тараз,Түркістан облысы сынды еліміздің өзге де өңірлерінен келген медицина мамандары қатысып, біліктіліктерін арттырған болатын.
