Ұрпақтан-ұрпаққа жеткен ата-мұрасын жаңғыртып, өнерлі жастардың өресін биіктеткен республикалық «Дарабоз» байқауы Шымкентте өтті. Бесінші рет ұйымдастырылып жатқан сайыста 4-18 жас аралығындағы балалар бақ сынап, өнердің 14 түрінен таланттарын танытты. Жалынды жастардың жарқылындай болған байқау «Атадан мұра» қоғамдық қорының бастамасымен өтіп, дарындылардың ішінен дарабозы анықталды.
Шымкентте өткен бесінші республикалық «Дарабоз» өнер байқауына жүздің ішінен жүйрік шыққан, мыңның арасынан тұлпардай оза шығып, талантымен топ жарған кіл мықтылар қатысты. Өнер бәйгесіне Шығыс Қазақстан, Абай, Жетісу, Алматы, Қызылорда, Атырау, Ақтөбе облысынан және мегақалалардан 700-ден астам жастар келіп, 14 аталым бойынша бақ сынады. Байқауға Бақшадағы бүлдіршіннен бастап мектептің жоғары сыныбына өткен жасөспірімдер өнерлерін ортаға салғанда, бірінен-бірі асып түсіп жатты.
Өнер додасын ұйымдастырушы — «Атадан мұра» қоғамдық қоры. Еліміздің әр аймағында тамаша талант иелері бар. Көп жағдайда, осы балалардың өнерін көпшілік көрмей, өнердің биігіне шығатын жастар шетте қалып жатады. Аталған қоғамдық қордың мүшесі, республикалық және халықаралық байқаулардың ұйымдастырушысы Ғалымжан Бекболатов: — Ұлттық өнердің маңызын айшықтау мақсатында еліміздің түкпір-түкпіріндегі жастардың жұлдызын жағу мақсатымыз,-дейді.
Ұлттық аспапты ұлықтап, нақышына келтіре ойнаған жас бүлдіршіндерді көріп сүйсінесің. Бойындағы талантымен көрерменді тәнті еткен өнерпаздардың өнерін таразылау төрешілерге де оңай түспесі анық.
Ұлттық аспапта ойнау, көркем сөз, дәстүрлі ән, қолөнер сынды ежелден келе жатқан төл өнеріміздің отын өшірмей, жыл өткен сайын жаңаруда. Он бес жыл бұрын құрылған қоғамдық қор осы уақыт ішінде талай жастың шабытын шыңдап, әлемдік додаларға жол көрсеткен.
Екі күнге ұласқан байқаудың қорытынды сәті де келіп жетті. Әр бала өзіндік дарынымен ерекшеленгенімен, байқауда жеңімпазды анықтау керек. Үздіктердің үздігін таңдау оңай болмады, дегенмен, ең мықтылар жеңіске жетті.
14 аталым бойынша ұйымдастырылған бесінші республикалық «Дарабоз» байқауына қатысқан барлық өнерпаздар мен дайындаған ұстаздары арнайы дипломмен марапатталды. Бас жүлдені алған жеңімпаздар «Атадан мұра» қорының бастамасымен өтетін шешуші сайыстың «Супер финалына» жолдама алды.