Ақпарат және қоғамдық даму министрі Шымкент қаласына жұмыс сапарымен келді, деп хабарлайды «Айғақ» телеарнасының тілшісі. Министр алғашқы кездесуін бұқаралық ақпарат құралдарының өкілдерімен басқосудан бастады. Онда қоғамға қызмет етуші саланың маңыздылығы, масс-медианың мүмкіндіктерін оңтайлы пайдалану жайы айтылды. Мегаполистің төртінші билік өкілдері ақпарат және қоғамдық даму министрі Дархан Қыдырәлімен кездесті. Келелі басқосуға қаланың қарымды қаламгерлері, ақпарат айдынының басшылары, ақпараттық порталдардың жетекшілері қатысты. Әріптестермен кездесуде министр азаматтық қоғам институттарын дамыту бойынша мемлекеттік қолдаулар және БАҚ туралы заңды жетілдіру бағытындағы кешенді жұмыстарды баяндады.
Дархан Қыдырәлі сондай-ақ, жаңа және дәстүрлі медианың негізгі проблемасы, коммуникация саласындағы маңызды мәселелерге тоқталды. Жиында жергілікті БАҚ қызметкерлері мемлекеттік тіл, баспасөз хатшыларының мәртебесі, отандық телеарналардағы жарнама, оқырман тәрбиелеу сынды қоғамдағы қордаланған өзекті мәселеге қатысты сұрақ қойды. Басқосу соңында министр қойылған сауалдар мен ұсыныстар назарға алынатындығын жеткізді. Сөз соңын журналистер бәсекеге қабілетті болуы керек және ақпарат майданында алдыңғы сапта жүру керек,-деп, әріптестеріне сәттілік тіледі.
