Қазақ ғылымының дамуына өлшеусіз үлес қосқан, Жезқазған сирек металл өндірісінің өркендеуі жолында еселі еңбек еткен Төлеген Бүкіров Республика күні қарсаңында «Құрмет» орденімен наградталды. 
Бүкіров Төлеген Нұрмағанбетұлы. Кеншілер әулетінің перзенті 1952 жылы Жезқазған қаласында дүниеге келген. 1973 жылы Жезқазған мыс заводының балқыту цехында пештер мен газ жүретін құбырларды тазалаушы болып жұмысқа орналасқан. Міне, осы кезеңнен бастап адал, әрі бейнеті көп еңбекке араласты. Табиғаттың тұнып тұрған байлығын зерттеуге деген құштарлықтың арқасында жоғары білім алып, металлург мамандығын иемденді. Жеңістің кілті маңдай тердің, адал еңбектің қатпарларына жасырынған. Құбыр тазалаудан басталған мехнатты кезеңде талай ауыртпалықты көтеріп, қиындық қажытса да артқа қайтпаған арда азаматтың атқарған ісін ел көріп, бүгінде құрмет-қошеметке бөлеп жүр.
Ол «Қазақтың Кетбұғасы» қоғамдық бірлестігінің негізін қалаған, Жезқазған қаласының Құрметті азаматы, бірнеше рет Құрмет грамотасымен марапатталған металлург, 57 ғылыми еңбектің, 14 патенттің авторы, ІІ және III дәрежелі «Еңбек даңқы» төсбелгісінің иегері. Бұл ел ағасының толассыз еңбегі мен атақ-даңқының бір парасы ғана.
Өмір жолы өнеге, еңбек жолы көпке үлгі болған, ізгілікті ізімен өшпес-өлмес өнеге жинап, тұнып тұрған Ұлытаудың қазынасын зерттеп, тілдің, ұлттың жанашыры болып, бүгінгіге байлық, келер ұрпаққа асыл қазына жинаған Төлеген Бүкіровті лайықты құрметімен құттықтаймыз!
