ТӨЛЕБИЛІК ОҚУШЫЛАР КІТАПТАН ТАПШЫЛЫҚ КӨРМЕЙДІ

Төлеби ауданының бүлдіршіндерінен бастап түлектеріне дейін енді оқулықтан тапшылық көрмейді. Ауданның адами әлеуетін дамытуға бөлінген қаржы да едәуір өскен. Бұл туралы “Білімді ұлт: терең білім, еңбекқорлық және отаншылдық қасиет” тақырыбындағы педагогтердің тамыз кеңесінде айтылды. Ұрпақты тәрбиелейтін ұстаздардың жиынында өткен оқу жылы қорытындыланып, өңірдегі білім беру жүйесін жетілдірудегі негізгі мақсаттар межеленді. Жалпылама жоспар ғана айтылмай, білімдегі өзекті мәселелер талданып, кем тұстары да көпшіліктің талқысына түсті.

Тамыры тереңге кеткен, білімнің бастауына жетелейтін тамыз кеңесі Төлеби ауданында жалғасын тапты. Алдымен, өткен жылы жеткен жетістіктер сараланып, кемшіліктер де жарияланды. Ауданның білім ұялары басшылары мен ұстаздардың басын қосқан кеңеске аудан әкімі Төлеген Телғараев қатысып, алғы сөзді өзі бастады.

Биыл Төлеби ауданындағы барлық мектеп оқушылары 100 % кітаппен қамтылады. Ауданның білім саласын дамытуға 16 млрд теңге бөлініпті. Ол қаржы Төлебиден жаңа мектептер салуға, қайта жөндеуден өткізуге, арнайы сынып кабинеттерін жабдықтауға сынды білім саласын қамтитын барлық қажеттілікке жұмсалады. Осы тұста ауданның пән кабинетімен жабдықталуы әзірге 59 %-ды құрағанын айтып өткен жөн. Мінбердегі сөзді жалғаған аудандық адами әлеуетті дамыту бөлімі басшысының міндетін атқарушы Ардақ Мәдіханқызы ауданның білімдегі озығы мен кенде келе жатқан тұстарына тоқталды. Айталық, аталған өңірде республикадағы үздік 100 мектеп қатарына қосылған білім ұясы бар. Сондай-ақ, білім сапасының өткен жылмен салыстырғанда 0,4% өскенін, алайда бұл төмен көрсеткіш екенін айтты.

Әр жаңа оқу жылында алға қоятын басты мақсат — білім сапасын арттыру. Жаңа Қазақстандағы алғашқы тамыз кеңесінде ауыз толтырып айтарлық жаңалық та жоқ емес. Білімдегі биіктерді бағындыру туралы жаңашылдықты өзгеден іздемей, республикада топ жарып жүрген жергілікті ұстаздардан бастап үйренуіміз керек. Түркістан облыстық әдістемелік орталығының директоры Бақытжан Төлімбет осылай дейді. Бұл мақсатта “45 минут” бағдарламасы мен “Директорлар дебаты”сынды бағдарламалар қарастырылып жатыр екен.

Білім сапасын жақсартуда педагогтердің біліктіліктерін ұдайы арттырып отыру маңызды. Білгенін оқушыға үйрету, оны заман ағымына сай білікті азамат ретінде қалыптастыру ұстаздың міндеті. Шара барысында түрлі тақырыпта баяндама оқылды. Сондай-ақ, ұлы қызметте ұлағатты маман атанып жүрген бір топ ұстаздар құрметке бөленді. Төлебилік мұғалімдер Түркістан облысы әкімінің арнайы алғыс хатымен марапатталды. Сондай-ақ, ауданның 90 жылдық мерейтойы қарсаңында Төлеген Тұртайұлы да ағартушылық қызметті атқарып жүрген жандарға алғыс хат табыстап, мерекелік төсбелгі тақты.

Ал, оқу-ағарту министрлігінің алғысы және кәсіподаққа еңбегі сіңген елеулі жандарды облыстық адами әлеуетті дамыту басқармасы басшысының орынбасары Ардақ Садықова табыстады .

Тамыз кеңесі барысында аудан әкімі мен жергілікті білім бөлімінің мамандары ауданның абыройын облыс, республикада асқақтатып жүрген жас дарындардың да жұмысымен танысты.

Жыл сайын жаңа оқу жылы қарсаңында өткізілетін тамыз кеңесі ұстаздар үшін маңызды жиын. Маңыздылығы — алдағы бір жылға мақсат-жоспарларды бағдарлап, міндеттерді айқындауында.