ҚУҒЫН-СҮРГІН ҚҰРБАНДАРЫНА ТАҒЗЫМ!

 31 мамыр қазақ тарихындағы қанмен жазылған қасіретті, азалы күн! Қуғын-сүргін жылдары солақай саясаттың салдарынан қаншама Алаш зиялысы негізсіз орға жығылды. Елім деп өткен Алаш арыстары да айыпсыз суық қарудың көзіне ілінді. Әкесін перзентінен, аяулы жарынан айырған сұм оқиға ешқашан естен шықпайды. Бүгін Шымкент қаласында қуғын-сүргін құрбандарының ұрпақтары мен қала тұрғындары «Қасірет» мемориалында ата-баба рухына тағзым етіп, құран бағыштады.

 Қазақ көсемдерінен бастап зиялы қауым өкілдеріне дейін жазықсыз жала жауып, орға жыққан отарлау саясаты қарға тамырлы қазақ халқы үшін ауыр соққы болды. Кеңес одағының солақай саясаты бойынша отарланған ұлттың бас көтере алмай, құлақкесті құл болуы үшін, саналы азаматтарының бәрін дерлік қуғын-сүргінге айдады. Бүгін қасіретті оқиғаның желісімен Шымкент қаласының зиялы қауым өкілдері мен қуғын-сүргінге ұшыраған азаматтардың ұрпақтары «Қасірет» мемориалында бір минут үнсіздікпен еске алып, гүл шоқтарын қойды.

Қазақ даласының етегіне сор болып жабысқан бұл оқиға жұт болып келді десек артық еместі. Қолда бар деректерге сүйенсек, 1931 жылдан бастап 1954 жылдың 1 ақпанына дейінгі кезеңде  КСРО-да соттан тыс және сот органдары 3 млн 777 мың адам ату жазасына кесілген. Елім деп емешегі үзілген қазақ интеллигенциясының қаймақтары Әлихан Бөкейханұлы, Ахмет Байтұрсынұлы, Міржақып Дулатұлы, Сәкен Сейфуллин, Мағжан Жұмабаев сынды марқасқаларымыз да бұл тізімде бар. Бүгінгі аға буын өкілдері айыпсыз опат болған ата-баба рухына тағзым ету өздерінің перзенттік парызы деп біледі.

 Кезінде қуғын-сүргінге ұшыраған азаматтардың ұрпақтарымен тілдескен шаһар басшысы оларға көңіл айтып, демеу көрсетті. Мұрат Дүйсенбекұлының айтуынша мемлекет басшысының тапсырмасына сәйкес қазіргі таңда қуғын-сүргін құрбандарын ақтау үшін арнайы комиссия құрылып, жан-жақтан деректер жинақталуда.  Айта кетейік, Тәуелсіздік жылдары аралығында 146,5 мың күнәсіз жазғырылған отандасымыздың есімдері жазылған 14 «Аза кітабы» жарыққа шықты. Заңнамаға сәйкес 340 мыңнан астам заңсыз қуғын-сүргінге ұшыраған азаматтар ақталған болатын.