Тәуелсіздік – еліміздің баға жетпес байлығы.
Биыл Егемен ел Тәуелсіздігіне 30 жыл толып отыр. Осы орайда айтулы мерекеге арналған шара Арыс қалалық мәдениет үйінде кең көлемде аталып өтті. Ал онда сөз алған қала әкімі Гүлжан Мамытқызы барша Арыс тұрғындарын тұғыры биік Тәуелсіздік күнімен құттықтады.
Егемендігіміздің 30 жылында Қазақстан әлемге жеке дара дербес ел екенін дәлелдей білді. Өзінің шекарасы, діні мен тілі, мемлекеттік рәміздері мен ұлттық құндылықтары, мәдениеті мен салт-дәстүрі бар тәуелсіз зайырлы елге айналды. Ең бастысы мемлекетіміз осы уақыт аралығында өзінің ішкі және сыртқы саясатын, экономикасын қалыптастыра отырып қуатты елге айналды. Бұл тұрғыда Арыс қаласының белсенді азаматтарының да Тәуелсіз еліміздің дамуы жолында сіңірген еңбектері мол. Сондықтан мерекеде қала әкімі бірқатар азаматтарға мемлекеттік наградаларды салтанатты түрде табыс етсе Арыс өңірінің өркендеуіне үлес қосқан азаматтар қаланың құрметті азаматы атанды. Солардың қатарында жергілікті жердің тумасы, теміржол саласының ардагері Құрмет Көшенов ақсақал да бар. Қызмет жолында 40 жылға жуық теміржолшылар қаласында еселі еңбек еткен азамат айтулы мерекеде ерекше құрметке ие болды.