ҚАЗАҚ КҮРЕСІНЕН ҚАЖЫМҰҚАН МҰҢАЙТПАСОВТЫҢ 150 ЖЫЛДЫҒЫНА АРНАЛҒАН ХАЛЫҚАРАЛЫҚ ТУРНИР БАСТАЛДЫ

 Бүгін Түркістанда қазақ даласының батыры Қажымұқан Мұңайтпасовтың 150 жылдық мерейтойына арналған қазақ күресінен дәстүрлі халықаралық турнир басталды. Әлемдік доданы Түркістан облысы әкімдігі ұйымдастыруда. Жарыстың ашылуы барысында батыр баба туралы телефильм көпшілік назарына ұсынылды.

 Кіл мықты балуандар бәсекесіне биыл Ресей, Өзбекстан мен Қырғызстаннан келген 200-ден астам апайтөс саңлақтар қатысып, бақтарын сынауда. Бұған дейін бұл халықаралық турнир өзінің деңгейінен түскен емес. Қажымұқан бабамыз қазақ күресін әлемдік аренада дамытқан бірден бір тұлға. Жыл сайын ауқымы кеңейіп келе жатқан бұл турнирдің маңызды екендігін жеткізген Түркістан облысы әкімінің орынбасары Сакен Қалқаманов жарыстың ашылу салтанатында сөз сөйлеп, күрестің әлемдік деңгейде өркендеп жатқанын айта өтті.

«Керуен сарай» əмбебап орталығындағы «Арена шоу» ойын сауық кешенінде қазақ күресінен өтіп жатқан бұл күрес додасында түркістандық балуандар көш бастауда. Боз кілемде таланттарымен танылған мықты саңлақтардың арасында жеңімпаз болған балуанға бас жүлдеге темір тұлпар беріледі. Түркістан облысының әкімдігі бұл доданың жоғары деңгейде ұйымдастырылуына ат салысып, талай жас балуандардың тұсауын кесуге ықпал етуде. Қажымұқан атамыздың немересі халықаралық дәрежедегі спорт шебері, Қазақстанға еңбек сіңірген жаттықтырушы Шаттық Қажымұқан бұл турнирге арнайы келіпті.

Қазақ күресін дүниежүзі бойынша дамытуда маңызы жоғары бұл халықаралық турнирге көршілес елдерден ресейлік, өзбекстандық және қырғызстандық ең танымал деген балуандар қатысуда. Ел Тәуелсіздігіміздің 30 жылдығымен тұспа-тұс келген батыр бабамыздың 150 жылдығы Түркістан облысында кеңінен бастау алуда.Бұл додада барлық спортшыларға даңқты балуан жайлы жазылған кітап беріліп, тарихи мұражайы ашылды. Ал, облыстық дене шынықтыру және спорт басқармасының басшысы Қанат Жолдықараевтың бастамасымен қазір аудан, ауылды жерлерде жастар арасында қазақ күресі заман талабына сай жаңғыртылуда.