Шардара ауданынан балбал тас табылды. «Шекертөбе» деп аталатын Абай-Шардара тасжолының бойындағы егістік алқаптан шыққан көне жәдігер Түркістан облысы үшін тарихтың тағы бір жаңа бетін парақтауға негіз.
Археолог Зейнолла Самашевтың айтуынша бұл құндылық VI-X ғасырларға тиесілі. Ескерткіш өз заманының атақты қолбасшысына арнап жасалуы бек мүмкін. Өйткені балбал тас бетінде әскери бас киім анық бейнеленіпті. Көне жәдігерді тапқан жер иесі Төребековтер әулеті қазіргі таңда тасты орнына қайта қойып, арнайы қоршау жасатты.
Қазақстан Республикасының Тұңғыш Президенті-Елбасы Нұрсұлтан Назарбаевтың «Қазақстанның қасиетті жерлерінің мәдени-географиялық белдеуі – неше ғасыр өтсе де бізді кез келген рухани жұтаңдықтан сақтап, аман алып шығатын символдық қалқанымыз әрі ұлттық мақтанышымыздың қайнар бұлағы» — деген сөзін ұран еткен шардаралық отбасы ендігі кезекте, бұл жердің тарихи-мәдени ескерткіштердің орны ретінде тиісті басқарма тарапынан мемлекет қорғауына алу қажеттігін сұрайды. Суқоймаға жақын маңдағы балбал тасы орналасқан Шекертөбе қойнауында қаншама сыр жатқаны белгісіз…
