Қала басшысы Рашид Абатұлының басшылығымен өткен апталық мәжілісте дербес бөлім басшылары 2020 жыл қорытындысы мен алда атқарылатын жұмыстар жөнінде баяндама жасады.
«Құрылыс бөлімінің» басшысы Жандос Тасовтың баяндамасына сәйкес, облыс орталығындағы құрылыс жұмыстары жүйелі жолға қойылып, жемісті нәтиже көрсетуде. Бірқатар ірі жоба арқылы Түркістан қаласын абаттандыру жұмыстары жүйелі жүзеге асуда.
Атап айтқанда, «Тұңғыш Президент саябағының» 3 500 ш.м аумағына гүл мен 2955 дана ағаш егілсе, Б.Саттарханов бойындағы «Желілік саябақ» аумағына 4 200 дана ағаш, 15 700 гүл, 20 700 бұта егіліп, 13,2 га жеріне көгалдандыру жұмыстары жасалуда.
Ал,құрылысы жүріп жатқан «Қалалық саябақтың» (Дендросаябақ) 2360 ш.м аумағына гүлдер егіліп, көгалдандыру жұмыстары 20 476 ш.м жеріне жүргізілуде. Сонымен қатар акация, талшын, катальпа, эльдар қарағайы, қара қарағай, қырым қарағайы, шынар сынды т.б 12 000 дана ағаш түрлері егілуде.
2020 жылы бөлім тарапынан 115-ке жуық нысанның құрылысы қарқын алған. Атап айтқанда, тұрғын үйлер бойынша – 89 нысанға, инженерлік инфрақұрылым бойынша – 21 нысанға құрылыс жүргізілсе, абаттандыру жұмыстары 5 нысанда жүргізілуде.
Қазіргі таңда, Әкімшілік-іскерлік орталықтан бой көтеріп жатқан 7 қабатты 24 тұрғын үй мен «Turkistan jana kala» шағын ауданындағы «Сырдария» және «Арман» тұрғын үй кешендерінің аумағына газ, электр, су және кәрізбен жабдықтау жұмыстары жүргізілуде. Жоспар бойынша 7 қабатты 17 тұрғын үй мен 12 қабатты 20-ға жуық тұрғын үй келер жылы инфрақұрылыммен қамтамасыз етіліп, кезекте тұрған азаматтарға табысталады.
