Биылдан бастап Түркістан облысының әкімі Ө.Шөкеев Мақтаарал, Жетісай, Сарыағаш, Келес, Шардара аудандарының инфрақұрылымын дамытуға басымдық беруде, — деп хабарлайды Түркістан облысы әкімінің баспасөз қызметі.
Бес ауданда қолға алынған жұмыстардың табысты жүзеге асуын өз бақылауына алған Өмірзақ Шөкеев Сарыағаш, Келес аудандарын аралады.
Алғашқы нысанды Жібек жолы ауылдық округіндегі «Бес жұлдыз» бала бақшасының жұмысымен танысудан бастаған облыс әкімі 450 баланы тәрбиелеп отырған мектепке дейінгі білім мекемесінің ұжымымен сөйлесіп, құрылтайшысымен кездесті.
Бұдан кейін өңірдің ауыл шаруашылығы саласына айтарлықтай үлес қосып жатқан өнеркәсіптік жылыжай кешенімен танысты. Жібек жолы ауылдық округі, Зортөбе елдімекенінде орналасқан кешеннің аумағы — 12,85 га.
Озық технологияларды пайдалана отырып көшет өсіретін жылыжайда жылына 12 млн.дана көшет сатылымға шығарылады.
600 млн.тг инвестиция салынған нысанда кәсіпкер өз қаражаты есебінен автоматтандырылған басқару жүйесі бар төбеден бүрку арқылы суғару әдісімен орталықтандырылған жылыту қазандығын орнатқан.
Мұнан соң Жартытөбе ауылдық округі, Ынтымақ елді мекеніндегі Келес өзенінің бойындағы көпірдің құрылысымен танысқан Өмірзақ Шөкеев ұзындығы 60 м ені 10 м. болатын жобаның сапасын тексерді.
Келес ауданына жасаған сапары барысында өңір басшысы Абай ауылында «Ауыл — ел бесігі» бағдарламасы аясында жөндеуден өткен Т.Рысқұлов көшесінің жұмысымен және Қошқарата ауылдық округі, Жамбыл елді мекеніндегі № 29 жалпы орта мектебінің құрылысымен танысты.
Құрылысы былтыр басталған мектеп 2021 жылдың тамыз айында аяқталады деп күтілуде.
Атап өтейік, Түркістан облысы аудандары мен елді мекендерінің дамуына оң серпін беретін 67 жоба қолға алынған. 10 жоба Үкімет мақұлдауынан өтіп, 2021 жылы тиісті қаражат бөлінетін болды.
Бұдан бөлек, облыстық бюджет есебінен 40 млрд теңге қаралып, 57 жоба іске асырылып жатыр. Ол қаржының 30 млрд. теңгесі биыл бөлінсе, 10 млрд. теңгесі келесі жылдың еншісінде.
Аталған жобалар — әлеуметтік инфрақұрылымды құрайтын, ауылдық жерде мектеп, аурухана салу, жол тарту, газ құбырын қосу жұмыстарын жүргізуге арналған.
Былтыр облыс дамуының кешенді жоспары бекітілгенде негізгі басымдық халық саны 1 миллионға жуықтайтын оңтүстік аймақтың әлеуметтік инфрақұрылымын дамытуға берілсе, 2021 жылы Сарыағаш, Жетісай, Мақтаарал, Келес аудандарымен бірге Сайрам ауданын да дамыту көзделіп отыр.