Онлайн брифинг: Әйтенов Шымкентте енгізілген карантиндік шектеулер туралы айтып берді

Шымкент қаласында карантиндік режим 8 маусымға дейін ұзартылды. Бұл туралы үшінші мегаполистің бас санитариялық дәрігерінің қаулысы 24 мамырда шыққан болатын. Ал, бүгін 2 аптаға созылған уақытша шектеулер мен шаһардың әлеуметтік жағдайын қала әкімі Мұрат Әйтенов бұқаралық ақпарат құралдарының өкілдерімен өткізген онлайн брифинг барысында мәлімдеді, — деп хабарлайды «Айғақ-Ақпарат» тілшісі.

Қала сыртындағы блок-бекеттер жұмысын тоқтатпайды. 25 мамырдағы ҚР Денсаулық сақтау министрлігінің мәліметіне сәйкес, Шымкентте індет жұқтырғандар саны 606-ға жеткен. Оның 220-ы індеттен айығып шыққан. Қайтыс болғандар саны — 6.  Соңғы тәуліктегі эпидемиологиялық жағдай бойынша қаламызда науқас саны тіркелмегенімен, бұған дейінгі көрсеткіштерде өсім бар. Сондықтан да, карантиндік режимді ұзарту туралы ұйғарымға келген. Айта кетейік, Шымкент қаласында мемлекет тарапынан әлеуметтік төлем мәртебесі анықталған 283 мың адамға  берілсе, 1,5 млрд. теңге көлеміндегі қаржы коммуналдық төлемдер үшін жұмсалатын болды. Ал, 1,9 млрд теңге қазына қаржысынан Шымкенттегі азық-түлік бағасын тұрақтандыру үшін бөлінген. Мұнан өзге, 2020 жылдың 15 маусымына дейін несиелік өсімпұлдарды есептеу тоқтатылды. Сондай-ақ, карантиндік режимде жұмыс жасап жатқан 30 мыңнан астам құқық қорғау өкілдері мен медицина қызметкерлері бар.  Соның ішінде, 2764 ақ халатты абзал жанға бүгінгі күнге дейін 799 млн. теңге көлеміндегі үстемақы тағайындалған. Жалпы, Мұрат Дүйсенбекұлының мәлімдеуінше,  пандемия кесірінен Шымкентте ірі кәсіпкерлік нысандары мен халыққа қызмет көрсететін шағын және орта субъектілер 4,6 млрд теңге шығынға батқан.

Әуел баста, әкімдіктер арасында Шымкент қаласы мен Түркістан облысы арасындағы блок-бекеттерді алып тастау туралы келісімге келмек болған. Алайда, індет жұқтыру фактілері азаймағандықтан, мәміле кейінге шегеріліпті. Zoom платформасымен жүргізілген онлайн брифинг барысында Шымкент қаласының әкімі Мұрат Әйтенов келе жатқан аптада халықтың сұранысына сәйкес, бұл мәселенің тағы да қозғалатындығы туралы  айтып берді. Қаланың кіре берісіне орнатылған блок-бекеттер алынып тасталуы да бек мүмкін.