20 сәуір күні Түркістан қаласына ҚР Президенті Қасым-Жомарт Тоқаевтың Жарлығына сәйкес әскери міндеттілер арнаулы жиынға шақырылған болатын. Осы күннен бастап қала тұрғындарының қауіпсіздігі мен денсаулығын қорғау мақсатында 50 азамат арнайы әскери міндетіне кірісті. Өз еркімен келіп, елмен, халықпен бірге екендіктерін көрсеткен әскерилер блок-бекеттерде тәртіпті күшейтіп, залалсыздандыруды жандандырды. Сонымен қатар, қалалық полиция өкілдерімен бірге мөлтек аудандардағы патрульдік қызметте болды. Бүгін арнайы жиынның аяқталуымен облыс әкімінің орынбасары С. Қалқаманов құттықтап, қызмет ету барысында тілсіз жаудан бір отбасын құтқарып қалған азаматтарға ілтипатын білдірді. Жалпы, Түркістан облысында 230 әскери міндетті болса, соның 50-і Түркістан қаласына жұмылдырылған еді. Олар бұған дейінгі қызметі бойынша айлығын алуын тоқтатпады. Ал, жұмыссыз азаматтар 42500 теңге көлемінде қаржыға ие болды
Сондай-ақ, тамақ, киім-кешек, медициналық көмек түрлері жасалды. Әскерилер ҚР Қорғаныс министрі, генерал-лейтенант Н. Ермекбаевтың арнайы грамотасымен, Оңтүстік өңірлік қолбасшылығы әскерлерінің қолбасшысы, генерал-майор К. Каракуловтың алғыс хатымен, облыс әкімі Ө. Шөкеевтің және қала әкімі Р. Аюповтың алғыс хаттарымен марапатталды. Айта кетейік, әскерилер қатарында Түркістан облысы әкімінің орынбасары С. Қалқаманов пен қала әкімінің аппарат басшысы Ж. Наушабай да бар.
