Төлеби ауданында қарқынды құрылыстар басталды

Су тасқынынан зардап шеккен Төлеби ауданында жарамсыз күйге түскен тұрғын үйлер қайта салынуда. Яғни, сел салдарынан баспаналары қираған ауданындағы 30-дан астам отбасы алдағы 2 ай ішінде жаңа үйге көшеді. Жаңа баспаналар заманауи талаптарға сай салынып, өз мерзімінде пайдалануға беріледі деп күтіліп отыр. Нөсерлеп жауған жауын кезінде Достық елді мекеніндегі Жылқыбаев көшесі №31 үйде тұратын Эльдар Оспановтың да баспанасын белуардан су басқан болатын. Міне, осы жағдайдың салдарынан кейін арнайы комиссия аталмыш үйді жарамсыз деп таныса дәл қазіргі күні су басқан баспана толықтай сүріліп, жаңа тұрғын үй құрылысы басталған.

Бұл тұрғыда баспана иесінің облыс, аудан басшылығына айтар алғысы шексіз. «Айтылған уәде шұғыл орындалып, бұзылған үйімнің орнына сол көлемдегі жаңа үй салу жұмыстары қарқынды жүріп жатқандығы үшін шынайы қуаныштымын» — дейді. Айта кету керек, Төлеби ауданы бойынша су тасқынынан жалпы саны 38 үй жарамсыз деп танылса, оларды қайта салуға республикалық бюджет есебінен 510 млн. теңге қаржы қаралған. Бұдан өзге бұзылған инфрақұрылым жүйелерін жөндеуге облыстық бюджет есебінен 100 млн. теңге бағытталып отыр. Бұл туралы Төлеби аудандық экономика және қаржы бөлімінің басшысы Мансұрбек Ашрапов мәлімдеді.