13 мамыр күні кешкісін жауған нөсер жауын салдары халықты әбігерге түсіргені рас. Түркістан облысының Төлеби, Бәйдібек, Қазығұрт, Сайрам аудандарында жаңбыр селге ұласып, бірнеше ауылдардың аулалары мен тұрғын үйлеріне зақым келген. Ал, бір ғана Қасқасу ауылының 3 бірдей көпірін қызыл су шайып кетті. Сондай-ақ, Шымкент қаласының Еңбекші ауданына қарайтын Елтай ауылының тұрғындарын да түн ортасында эвакуациялауға тура келді. Шымкент қаласының әкімдігі қолға алған шұғыл шаралардың арқасында Төтенше жағдайлар департаментінің қызметкерлері авариялық-құтқару жұмыстарын жүргізген.
Құтқарушылардың 57 қызметкері, 14 техника мен МП-100 маркалы 14 мотопомпа жұмылдырылып, ТЖД күштері суды шығару жұмыстарын жүргізді, жергілікті атқарушы органдарының коммуналдық қызметтері арықтардың механикалық тазалауын жүргізген.
Ал, 14 мамыр сағат 01.14-те Еңбекші ауданы, Откорм.совхоз Гаухар тас көшесінде қатты жауын-шашын салдарынан Бадам өзенінің тасуы орын алды. Жағалаудың бұзылуы салдарынан 2 тұрғын үйдің құлауына қауіп төнді (үйлерге дейін арақашықтық 7-8 метр). ТЖД күштерімен қауіп төніп тұрған 2 үйден 17 тұрғын Бадам-1 елді мекеніндегі №84 орта мектебінің негізінде құрылған эвакуациялық жиналу пунктіне көшірілді. Зардап шеккендер мен қайтыс болғандар жоқ. ТЖ салдарын жоюға ТЖ департаментінің 16 қызметкері және 5 техникасы жұмылдырылған.
