Түркістан қаласында 5168 отбасыға 50 мың теңге қаржылай көмек табысталды

     Түркістан қаласында «Birgemiz» қоғамдық қоры арқылы 10 071 жанұяға 50 мың теңге берілді. Алайда, бұл қаржылай көмек бәріне бірдей тиесілі емес. Бұл жайлы «Nur Otan» партиясы Төрағасының бірінші орынбасары Бауыржан Байбек мәлімдеген еді. Нақтырақ айтсақ, 7 санат бойынша іріктелген отбасыларға табысталуда.

     Түркістан қаласының кәсіпкерлері «Birgemiz» қоғамдық қоры аясында халыққа көмектесіп жатыр. Қаржылай көмекті кімдер алатыны сан мәрте БАҚ айтып жатса да, әлеуметтік желіде наразылық білдірген жандардың саны азаймай тұр. 7 санаты жіпке тізіп нақты түсіндіру үшін тіпті, «Nur Otan» партиясы Түркістан облыстық филиалы төрағасының бірінші орынбасары Бейсен Тәжібаев әлеуметтік желіде тікелей эфирге шықты. Карантин режимі бекітілген уақыттан бастап, рухани астанада 4903 отбасыға табысталса, ал бүгін 5168 адамның есеп шотына аударылуда. Жалпы, бір ай көлемінде Түркістан қаласының көмекке аса мұқтаж 10 071 отбасына нақты көмек көрсетіліп отыр.

Бұл – кәсіпкерлердің елге деген қосымша көмегі. Бюджет қаражаты жұмсалмаған. Сондықтан, тұтас қаланы қамту мүмкін емес. Дегенмен, бір қала үшін 10 мыңнан астам отбасының көмекке ие болуы – үлкен көрсеткіш. «Birgemiz» қоғамдық қоры тағы 210 мыңнан астам мұқтаж отбасыға қаржылай көмек көрсетуді жоспарлауда.