ОҚМУ-да жаңа технологияларға бағытталған конференция өтті

М.Әуезов атындағы Оңтүстік Қазақстан мемлекеттік университетінде «Өндірістік технологиялар және инжиниринг» атты  VI Халықаралық конференция болып өтті, деп хабарлайды аталмыш оқу ордасының баспасөз қызметі.

Мемлекет басшысы Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында «Білім беру сапасын жақсартуда  ғылым саласына  ерекше назар аударуымыз керек. Біз ғылымсыз еліміздің дамуын қамтамасыз ете алмаймыз» деген болатын. Қазіргі ғаламдану заманы қандай елдің болмасын даму жолын анықтауына үлкен салмақ салып отыр.

 ХХІ ғасыр бірінші жағынан ғылым мен өндірістің қарқындап дамыған инновациялық технологиялар ғасыры болса, екінші жағынан дамыған елдер экономика әлемінде өз бағыт-бағдарын бекем ұстап, ешкімді жақындатпай, алда жүруді мақсат тұтуда.

Конференцияға Қазақстаннан өзге, алыс-жақын шетелдік мемлекеттердің ғалымдары қатысты. Олардың қатарында Оңтүстік Кореяның бас консулы Ким Хынг Су, Термез мемлекеттік унверситетінің профессоры Шокирджон Джураев, Хериот-Ватт университетінің профессоры Ивахненко Олександр, Падова университетінің профессоры Даниэле Конфикони бар.

Жиынды университет ректоры, модератор Дария Қожамжарова ашып, университеттің соңғы жылдарда жеткен жетістіктеріне тоқталып өтті.

Ректор өз сөзінде: «Бүгінгі таңда университеттің 14 оқытушысы ТОР-50 үздік Қазақстандық ғалымдардың рейтингісіне кірген. 217 ғалым Хирш индексі бойынша авторлық құқыққа ие. 2018-2019 оқу жылында 45 ғылыми жоба гранттық қаржыландыруға ие болды. Ол 700 миллион теңгені құрап отыр» деді.

Сонымен қатар, конференцияның жинағына 297 ғылыми мақала келіп түскендігін, оның 21-і шетелдік ғалымдардың еңбектері. 143 мақала шетелдік және ОҚМУ ғалымдарымен бірлесіп жазылғандығына тоқталып өтті.

Конференция мемлекет пен қоғамның тұтастай  дамуын қамтамасыз ету мақсатында, ғылыми зерттеулер мен практикалық жұмыстың нәтижелерімен алмасу үшін мүмкіндік беретін ірі халықаралық алаңына айналды.

Іс-шара аясында ғылыми жетістіктер қойылған көрме ұйымдастырылды. Онда ғалымдарымыздың студенттермен және мектеп оқушыларымен бірлесіп жүзеге асырған жобалары таныстырылды.