Қазақ поэзиясының Құлагері атанған Ілияс Жансүгіровтің туылғанына биыл — 125 жыл! Алаш арысының есімін ұлықтап, шығармашылығын насихаттайтын бүгінгі ұрпағы өзі туған жерінде асқан құрмет көрсетті.
Алматы облысы, Ақсу ауданының Жансүгіров кентінде бой көтерген тас мүсіннің ашылу рәсімі «Дала дастаны» спектакліне ұласты.
Ілияс Жансүгіров – ақын, драмашы, прозашы, оның поэзиясы ұлттық әдебиеттің классикалық байлығының қатарына жатады, қазақ әдебиетінің негізін қалаушылардың бірі. 1894 жылы Алматы облысының Ақсу атты ауданында дүниеге келген ол Ташкенттегі екі жылдық мұғалімдік курсты бітіріп, өз ауылында мұғалім болған. Одан кейін аз уақыт «Тілші» газетінде істеп, Верныйдағы Қазақ ағарту институтының меңгерушілігіне тағайындалды. Мәскеудегі Коммунистік журналистика институтын бітірген, соң «Еңбекші қазақ» газетінде қызмет атқарды. 1932-1934 жылдары — Қазақстан Жазушылар одағы ұйымдастыру комиссиясының төрағасы. 1933-1936 жылдары Қазақ КСР Орталық атқару комитетінің мүшесі болды. 1938 жылы саяси қуғын-сүргін құрбаны болды.
І.Жансүгіровтің 125 жылдығына арналған республикалық ғылыми-тәжірибелік конференциясына Түркістан облыстық мәслихатының депутаты, «Айғақ» Телередиокомпаниясының бас директоры Дулат Әбіш те арнайы шақырту алған болатын.
Мерейтойды ұйымдастырудың басы-қасында жүрген ҚР мәдениетіне еңбегі сіңген қайраткер, белгілі журналист Нұртілеу Иманғалиұлы. Бұл шараға Алматы облысының әкімі Амандық Баталов арнайы келіп, рухани жаңғырумен астасқан айтулы жиынның алғысөзін ашып берді.
Ал, бүгінгі жиынға Ташкенттен арнайы келген Қазақстан мен Өзбекстан достығының дәнекері болып жүрген жазушы, Өзбекстан Республикасының Тұран Ғылымдар Академиясының және Қазақстан Республикасының Гуманитарлық Ғылымдар Академиясының академигі, профессор Қалдыбек Сейдановқа Алматы облысының әкімі амандық сұрасып, құрмет көрсетті.
