М.Әуезов атындағы ОҚМУ-ға 10 мың студент қабылданды

  Бүгін еліміздегі іргелі, көпсалалы мемлекеттік оқу ордасы М.Әуезов атындағы Оңтүстік Қазақстан мемлекеттік университетінде Білім күні мерекесі тойланды. Аталған іс-шараға Шымкент қаласының әкімі Ерлан Айтаханов қатысып, барша 1 курс студенттеріне сәттілік тілеп, еліміздің білімі мен ғылымының дамуында үздік жетістіктерге қол жеткізіп, өскелең ұрпақты тәрбиелеу ісінде аянбай тер төккені үшін бірқатар профессор-оқытушылар құрамын Шымкент қаласы әкімінің алғыс хатымен марапаттады. Жиында сөз алған университет ректоры Дария Қожамжарова: «Білім – барлық игілік пен байлықтың, бақыт пен берекенің, дәулеттің қайнар көзі.
Білім алу – заңғар заманның басты, әрі бірегей талабы.
Білім беру– ата-ананың бала алдындағы қастерлі қарызы, тұтас қоғамның ұрпақ алдындағы қасиетті парызы.
Жоғары білім алу – ертеңінің еңселі болғанын қалайтын қай жанның да жүрекке түйген борышы.

Терең білімнің, адамгершілік пен рухани сананың негізі қаланатын, қазақтың заңғар жазушысы Мұхтар Омарханұлы Әуезовтің есімін иемденген Оңтүстік Қазақстан мемлекеттік университеті өміріндегі керемет кезеңге қадам басқан 1 курс студенттерін бүгінгі қуаныштарымен шын жүректен құттықтаймын»,-деп барша студент-жастарға ақ жол тіледі. Биыл университетке
95 мамандық бойынша 10000 студент қабылданды. Олардың 2184-і мемлекеттік грант иегерлері, сонымен қатар көпбалалы, әлеуметтік-атаулы көмек алатын отбасылардың балаларына арналған қосымша 6 мың гранттың 245-і осы университеттің студенттері атанып отыр. Магистратура білім бағдарламасы бойынша 298 студент қабылданды. Оның 220-ы грант иегерлері болып табылады. Ал, колледжде 240 студент білім алмақ.
Бүгінгі таңда университетте 104 ғылым докторы, 474 ғылым кандидаты, 601 магистр тұтас қоғамның ұрпақ алдындағы қасиетті парызын адал орындап, шәкірттерге өз дәрістерін беріп келеді.