Қазығұрт ауданында бір күнде су жаңа алты мектеп іске қосылды. Оның екеуі республикалық бюджеттің есебінен салынған. Жаңабазар ауылдық округіндегі бұл қуаныш жергілікті тұрғындарды керемет қуанышқа бөлеп отыр. Өйткені, осы уақытқа дейін аталған аймақтағы ағайын саманнан салынған мектепті місе тұтып келген. 
Қазығұрт ауданында 68 білім ошағы бар. Сол мектептердің басым көпшілігі жаңадан салынған немесе күрделі жөндеуден өткен. Енді биылғы оқу жылында тағы жаңа ғимараттар қосылып отыр. Жаңабазар ауылдық округіне қарасты Үлгілі елді мекенінің оқушылары үшін қуанышты жаңалық. Тозығы жетіп, партасы қисайып, орындығы санаулы қалған алтын ұялары жаңарды.
300 орынға шақталған мектептің атауы Мұхтар Әуезовтың есімін иеленген. Жазушының аты берілген алтын ұяда білім алғандар жаны ізгі жақсы азамат болып өсуі тиіс. Алдыңғы толқын ағалар осындай сеніммен сөз алып, қолдарына гүл ұстап келген оқушыларды құттықтады. Олардың қатарында ардагер де, әкім де, депутат та, кәсіпкер де бар.
Құрылыс өте қысқа мерзімде аяқталған. Мектептің алғашқы іргетасын қалап, шамы жарқырап жанғанша еңбек еткен «Қаржан Тау» жауапкершілігі шектеулі серіктестік. М.Әуезов атындағы жалпы орта мектепті сапалы, әрі тез аяқтаған компания құрылыс саласында тиянақты ісімен көрініп жүр. Жергілікті биліктің басшылары алғыс айтып, сосын ғимараттың лентасы қиылды.
Тұрғындар көп күткен мектептің іші талапқа сай жасалыпты. Ғимаратты көруге мектеп табалдырығын аттаған бүлдіршіннен бастап, ауылдың ақсақалдары асыға кірді. Қажетті құрал-жабдықтар енді ұқыппен ұсталса болғаны.
Жаңабазар ауылдық округіне қарасты Жылыбұлақ елді мекеніндегі оқушылар да бұл күні жаңа мектепке кірді. Шашына ақ бантик таққан балауса қыздар, ақ кофта кигендер шаттанып жүр. Өйткені, осы уақытқа дейін қысылып, қымтырылғандар енді кең ғимаратта тынысын терең алатын болды.
300 орынға шақталған мектептің құрылысын «Ақ Орда» компаниясы мойнына жүктеп алған. Тендірді жеңіп алған жеке серіктестік аз уақыттың ішінде сапалы аяқтады деп отыр. Жергілікті тұрғындардан алғыс алып, биліктегі басшылар арқасын қаққан «Ақ Орда» мекемесі кілтті табыс етті.
Қазығұрт ауданы бойынша 1200 бала жаңа мектептің табалдырығын аттады. Мұқтажы жоқ ұжымды енді тек сапалы білім ғана күтіп тұр. Аузы дуалы қариялардан бата алып, ғимараттың ішін көріп шыққандар дән риза. Өздерінің қуаныштарын жасыра алмай, ақжарма тілектерін арнап жатты. 
Қазығұрт ауданы білім саласы бойынша етегін енді жиып келеді. Түлектері тесттің қорытындысымен көзге соңғы жылдары көрініп жүр. Енді мектеп жаңарған киелі, тіршіліктің атауы басталған аймақтың білім саласын жағымды жаңалықтар ғана күтуі тиіс. Ендеше сәттілік тілейік.
