Үкімет басшысының орынбасары Жеңіс Қасымбек Арыс қаласын қалпына келтіру жұмыстарының барысымен танысты

ҚР Премьер-министрінің орынбасары Жеңіс Қасымбек 29 тамыз күні түс ауа Арыс қаласына жұмыс сапарымен келді. Мұнда Үкімет басшысының орынбасары апаттан зардап шеккен қаланы қайта қалпына келтіру бағытында облыстар мен аудан қалаларға жүктелген секторлардағы құрылыс барысымен танысты.

Мəселен, Арыс қаласындағы С.Қожанов атындағы жалпы орта мектебінің ғимараты жарылыс кезінде айтарлықтай зардап шеккен болатын. 1968 жылы салынған 900 орындық білім мекемесі бүгінде толықтай күрделі жөндеуден өткізіліп, жаңа оқу жылы қарсаңында оқушыларын қабылдауға сақадай сай тұр. Бұл нысанды толықтай жөндеу жұмыстары «Самұрық Қазына» ҰƏҚ АҚ есебінен жүргізілген.

Айта кету керек, Арыс қалалық білім бөліміне қарасты шаһарда жалпы саны 40 мектеп болса, орын алған жарылыс кезінде сол білім ошақтарының 16-на зақым келген. Алайда, ол мектептердің барлығы да қазір толық жөндеуден өтіп 1-қыркүйекте өз жұмыстарын бастайтын болады. Бұл туралы Арыс қалалық білім бөлімінің басшысы Əбдіхан Мұсаев мəлімдеді. Ал, сапалы атқарылған жұмыстарға ұстаздар қауымы мен ата-аналардың алғыстары шексіз.

Сапар аясында Премьер-министр орынбасары жөндеу жұмыстары аяқталған Арыс аудандық орталық ауруханасы мен бірқатар секторлардағы құрылыс барысымен арнайы танысты.

Бүгінде Арыс қаласын қайта қалпына келтіру шаралары аяқталуға жақын. Айталық, қаладағы 9 секторға жауапты ретінде Нұр-Сұлтан мен Түркістан қаласы бекітілген. Бұл секторда жалпы саны 642 жекелеген тұрғын үйлер мен 57 көпқабатты үйлерге жөндеу жұмыстары жүргізілетін болады. Қазір мұнда тиісті жұмыстарды межелі мерзімде аяқтау үшін құрылыс барысы қарқынды жүруде. Бұл тұрғыда жөндеу жұмыстары үшін жауапты штаб атынан бірнеше құрылыс компаниясы жұмыс жасауда.

«Айғақ-Ақпарат»

Оқи отырыңыз...

Қазығұрттық кәсіпкер ауруханаға 5 жасанды тыныс алу аппаратын алып берді

11.07.2020

Бейсен Тәжібаев түркістандық кәсіпкерлерді жаңа бастаманы қолдауға шақырды

11.07.2020