Бұл жөнінде 2019 жылдың 21 тамызында Түркістанда «Әлеуметтік медициналық сақтандыру қоры» КЕАҚ басқарма төрағасының орынбасары Ерік Байжүнісов өңірлік штаб отырысында мәлімдеді.
Жиын барысында медициналық қызметтерді сатып алуды цифрлық жүйеге көшіру, халықпен кері байланыс орнату және ақпараттандыру жұмыстары бойынша мәлімет берілді.
Биыл Үкімет тегін медициналық көмектің жаңа үлгісі мен МӘМС пакетін бекітті. 2020 жылдың 1 қаңтарынан бастап, еліміздегі барлық азаматтар екі пакет бойынша медициналық көмектерін алатын болады. 2020 жылы Түркістан облысында қаржыландыру деңгейі артады. 2019 жылға бекітілген бюджет 76,8 млрд.теңге болса, 2020 жылға 99,1 млрд.теңге бөлу жоспарланған. Оның 65,3 млрд теңгесі – кепілдендірілген тегін медициналық көмек пакетіне (ТМККК), 33,8 млрд теңгесі – МӘМС пакетіне жұмсалады.
Сонымен қатар, медициналық қызмет тарифтерін 15% дейін көтеру, медицина саласы қызметкерлерінің жалақысын өсіру, халықтың медициналық қызметке жұмсайтын жеке шығындарын едәуір төмендету көзделіп отыр.
Алдағы уақытта МӘМС жүйесінің енгізілуіне байланысты сақтандыру, медициналық көмек көрсету мәселелеріне қатысты сұрақтар көбейеді деген болжам бар. Осыған байланысты Қор кері байланыс каналдарын күшейтіп, 1 желтоқсаннан бастап өзінің call-орталығын іске қосады. Яғни, 1406 нөмірі арқылы:
— медициналық көмек мәселелері, жарна төлеу жолдары, төленетін жарна көлемі мен өсімпұлдар туралы толық мәлімет беріледі;
— халықтың шағымдары мен өтініштері қаралады;
— халықтың медициналық қызметке қанағаттану деңгейі бағаланады.
Биыл 1 қыркүйектен бастап Қарағанды облысында, ал 2020 жылдың 1 қаңтарынан Қордың барлық филиалдарында азаматтарды қабылдауға арналған стационарлық кабинеттер ашылады. Олар call-орталықтарының баламасы ретінде жұмыс істейді. Өзге елдердегі сақтандыру қорларының тәжірибесі негізінде шағымдарды басқару жүйесін құру көзделіп отыр.
Дереккөз: «Әлеуметтік медициналық сақтандыру қоры» КЕАҚ Түркістан облысы бойынша филиалы
