Сапархан Омаров: Кейбір тауарлар бағаларының өсуі өндіріс көлемінің төмендеуімен байланысты емес

   Ауыл шаруашылығы министрі С. Омаров бағаларды тұрақтандыру мақсатында азық-түлік тауарларының өңірлік тұрақтандыру қорларын қалыптастыру жұмыстары жүргізіліп жатқанын айтты.Бұл туралы primeminister.kz мәлімдеді.

Қазіргі кезде республика бойынша қолда бар және жауапты сақтаудағы азық-түлік тауарларының көлемі — 29,8 мың тонна. Сатып алу интервенцияларын жүргізу үшін әлеуметтік-кәсіпкерлік корпорациялар есебінде 3,7 млрд теңге қаражат бар.

Ауыл шаруашылығы министрлігі тұрақтандыру қорларын қалыптастыру тәсілдерін жетілдірді және әлеуметтік маңызы бар азық-түлік тауарларының бағаларын тұрақтандыру бойынша жаңа тетік енгізді.

Енді әлеуметтік маңызы бар азық-түлік тауарлары бағаларын тұрақтандыру тетіктері екі деңгейдегі құжаттармен реттелетін болады:

1) Әлеуметтік маңызы бар азық-түлік тауарларына бағаларды тұрақтандыру тетіктерін іске асырудың жалпы тәртібін айқындайтын, Ауыл шаруашылығы министрлігі бекітетін үлгілік қағидалар;

2) Жергілікті атқарушы органдармен бекітілетін, әр өңірдің ерекшеліктерін есепке алумен егжей-текжейлі тәртібін көрсететін өңірлік қағидалар.

С. Омаровтың айтуынша, кейбір тауарлар бағаларының өсуіне келетін болсақ, ол өндіріс көлемінің төмендеуімен байланысты емес.

2021 жылға қарай көкөніс өнімдерінің көлемін арттыру бойынша индикативті болжамдарға жету үшін ҚР АШМ-де тұқым, тыңайтқыш және гербицид бағасын жартылай арзандату жолымен негізгі субсидиялар қарастырылған.

Сонымен қатар, сыйақы мөлшерін субсидиялау, жаңбырлатқыш машиналар мен суару жүйелерін инвестициялық субсидиялау жолымен жеміс-көкөніс өнімдері өндірісін арттыру үшін экономикалық жағдайлар жасалған.

Мал шаруашылығы өнімдерінің өндірісін артыру үшін ет пен сүт өндірісінің көлемін арттыруды көздейтін ұзақ мерзімді салалық бағдарламалар бектілген.

Асыл тұқымды мал шаруашылығын дамытуды, мал шаруашылығы өнімінің өнімділігі мен сапасын арттыруды субсидиялау қарастырылған.

Өз кезегінде, «ҚазАгро» холдингімен қажетті несиелік ресурстар беріледі. 2018 жылы Холдингпен агроөнеркәсіп кешенін қаржыландыру көлемі 400,1 млрд теңгені құрады. Осы жылдың 1 тамызындағы жағдай бойынша АӨК қолдау мақсатында Холдинг 261,5 млрд теңге бағыттады.