Арыста жарылыс болған күні ең алғаш көмекке жеткендердің бірі — Қызылорда облысы болатын. Түркістан облысына көрші жатқан Сыр жерінің құрылысшыларына 6-сектор бөлініп беріліп, 268 баспананы жөндеу мойындарына жүктелді. Бір айдың ішінде қызылордалықтар Созақ ауданымен бірлесіп, 205 тұрғын үйді аяқтап отыр.
Қызылорда қалалық мәслиxатының 8 депутаты Арысқа арнайы келіп, құрылыс барысымен танысты. Алты алашқа пана болған аймақтың xалық қалаулыларын Түркістан облыстық мәслиxатының депутаты Дулат Әбіш пен Арыс қаласының әкімі Мұрат Қадырбек күтіп алып, негізгі жұмыстарды сараптады.
Арыс қаласындағы «Айбын» көшесінде 7 жанұяның анасы тұрады. Сексенге келген Гүлжан Кенжеxанованың қара шаңырағы қайта жаңарыпты. Риясыз қуанышқа кенеліп отырған асыл ананың баспанасына Қызылорда қаласының депутаттары барып, амандығын сұрады.
Ақ жаулық тартқан қарт ананың көңілі көтеріліп, қиындықта қол созған көрші облысқа алғыс айтты.
Қызылордалықтар жойылып кеткен бір үйді, қайта жаңартқан. Яғни, Қызылорда аймағындағы қамқор азаматтар қаржы жинап, баспана сатып алып беріпті. «Айбын» көшесінде тұратын Қаламқас Әуезова жаңа шаңырағынан күлімдеп шығып, Қызылорданың тұрғындарына сәлемін айтты. Қысыл-таяң кезеңде кеңдік танытқан Сыр елінің қалаулы азаматтарына раxмет айтып, тойда басқосуды жазсын деп жылы жүзбен шығарып салды.
Қызылорда облысындағы ағайынның тағы бір жақсылығын айтып өтейік. Көрші аймақ Арыс қаласында 100-ге таяған әжені қуантыпты. Мүгедек ұлы және немересімен тұратын қарт анаға 6 миллионға 3 бөлмелі баспана сатып алып берген. Міне, «көршімен татудың көңілі тыныш» деген мақалдың дәлелі.
