Еліміздің жүрегі Нұр-Сұлтан қаласында өзге елде аналогы жоқ «Татулық пен келісім формуласы: әлеуметтік бірлік және жаңғыру» тақырыбымен Қазақстан халқы Ассамблеясының XXVII сессиясы өтуде.
Тарихи басқосуға еліміздің Тұңғыш Президенті — Елбасы, Қазақстан халқы Ассамблеясының Төрағасы Нұрсұлтан Назарбаев, Қазақстан Республикасының Президенті Қасым-Жомарт Тоқаев, Қазақстан халқы Ассамблесяы Төрағасының орынбасары Жансейіт Түймебаев, сенаторлар мен мәжілісмендер, республиканың түкпір-түкпірінен келген түрлі этнос өкілдері, орталық атқарушы органдар, саяси партиялар, діни бірлестіктер, үкіметтік емес ұйымдардың басшылары, ЖОО ректорлары, шет мемлекеттердің дипломатиялық миссияларының өкiлдерi қатысып отыр.
Елорданың Бейбітшілік және келісім сарайында жиналған жұртшылықтың көкейінде бір мүдде — қоғам арасында баға жетпес байлығымыз татулықты сақтап қалу. Отырысты еліміздің Тұңғыш Президенті — Елбасы, Қазақстан халқы Ассамблеясының Төрағасы ашты.
Қазақстан халқы Ассамблеясының төрағасы жаңа орынбасарларын тағайындады.
«Халық ассамблеясының сессиясында төрағаның екі жаңа орынбасары тағайындалады. Биыл ассамблея кеңесі маған бұл қызметтерге ҚХА мүшесі, «Вайнах» шешен-ингуш мәдени орталығының мүшесі, кәсіби медиатор Юсуп Келигов пен ҚХА мүшесі, Нұр-Сұлтан қаласындағы «Өзбек этномәдени орталығы» қоғамдық бірлестігінің төрағасы Шерзод Пулатовты тағайындауға ұсыныс жасады», — деді Назарбаев.
Өзінің алғыс сөзінде Елбасы еліміздегі татулық пен бірлікті сөз етті.
«Ассамблея құрылған күннен бастап еліміздің мызғымас бірліктің ұйытқысы болып табылады. Иә, бүгінде күнделікті ұғым ретінде қалыптасып кеткен татулық, кейбір елдерде қол жетпес байлыққа айналып барады. Ерекше айтып өтетін жайт, бүгінде тек біздің елімізде орыс, өзбек, ұйғыр және корей сынды ұлттардың театрлары жұмыс істеп отыр. Мұндай жағдай өзге бірде бір елде жоқ» — деді Елбасы.
Айта кетейік, маңызды жиынға Түркістан облысынан 30 делегат, еліміздің үшінші мегаполисі Шымкент қаласынан 26 делегат келсе, елімізде 506 ассамблея мүшелері болса бүгінгі отырысқа соның 487-сі қатысып отыр.
Келесі жылы Ассамблея институтының ширек ғасырдағы жұмысы аталып өтіледі.
