Киелі Қазығұртта қазақтың үш биіне арналған еңселі ескерткіш бой көтерді

Нұх пайғамбардың кемесі қалған киелі Қазығұрт  мекенінде қазақтың Төле, Қазыбек, Әйтеке билеріне арналған еңселі ескерткіш бой көтерді. Ескерткіштің ашылу салтанатына Түркістан облысының әкімі Өмірзақ Шөкеев пен мемлекет және қоғам қайраткерлері, зиялы қауым өкілдері, Қазақстан Республикасы Парламенті Мәжілісінің депутаттары мен жергілікті жұрт қатысты. Қара қылды қақ жарған, әділ шешімімен алты алаштың ардақтыларына айналған ескерткіштің лентасы қиылды. Бұл шара Ұлы дала даналарының бірі Әйтеке Байбекұлының 375 жылдық мерейтойына ұйымдастырылып отыр.

Ұлт тарихын санаға сіңіру – бүгінгі ұрпақ парызы. Киелі Қазығұрттың бауырына жалғасқан Сарапхана елді мекеніндегі төбе соңғы жылдары Қазақстанның құрметті судьясы, мемлекет және қоғам қайраткері Бекет Тұрғараевтың бастамасымен үлкен саябаққа айналған еді.                                                                                                                         

Саябақ қана емес, нағыз рухани орталық. «Бабалар рухына тағзым» кешенімен бастау алатын негізгі композиция  «Ұлы шаңырақпен» жалғасады. Қазақстан Республикасының Тұңғыш Президенті – Елбасы Нұрсұлтан Назарбаевтың «Болашаққа бағдар: рухани жаңғыру» бағдарламасын туған жерде жүзеге асыруды мақсат еткен ел ағасы Бекет Тұрғараев соңғы екі жыл көлемінде жалғыз жатқан жайылым төбенің басына осылайша жан бітірді.

Қазақтың үш биінің құрметіне қойылған ескерткіштің лентасы қиылып, ұлттық рухқа тағзым жасалды бүгін. Күре жолдың бойында жатқан жар қабағы жалпы қауымға жақсылығын тілеп тұрғандай. Көңілдегі қарбалас, шын ниет қанша күннен бері Алланың нұры жауған жауыннан соң, күн шуағын шашқан ауа райының жылы шырайымен де ерекшеленді.

Республикамыздың түкпір-түкпірінен келген зиялы қауым өкілдері, Түркістанның тұрғындары бұл күнгі қуанышты шараның куәсі болды. 

Міне, Қазығұрттағы рухани орындардың қатары осылайша артып келеді. Туған жерден түлеп ұшқан асқақ ұландардың айтулы ісі баршамызға үлгі болары сөзсіз. Ал, қалың қазақтың құрметін арттырған қалаулы тірліктің Түркістанның мерейін үстем ете түскендігі бар. Мәртебесі биік, қайырымға толы бұл бастама рухани астанадағы ілкімді істердің нағыз жалғасы.   

Бұл күнгі шараға оңтүстік астанадан арнайы келген Қазақстанның халық әртісі Асанәлі Әшімов еңселі ескерткіштің ашылуымен құттықтап, 17 ғасырдың екінші жартысы мен 18 ғасырдың бірінші жартысында Ұлы дала медиаторлары атанып, аңызға айналған атақты үш би – Төле, Қазыбек, Әйтекелер туралы сөз қозғады.

Елбасының «Рухани жаңғыру» бағдарламалық мақаласы аясында бой көтерген тұғырлы ескерткіш тоғыз жолдың торабында орналасқан. Ұлы дала тарихында үш жүздің басын қосқан алып тұлғалы билердің алар орны ерекше. Халық арасындағы «елге бай құт емес, би құт» деген даналы сөз бүгінгі игі бастаманың дәлелі іспетті.

Бүгінгі күн – ертеңгі тарих. Елбасымыз айтқандай, әрбір азамат туған елінің, жерінің ел байлығын, жер байлығын, ер байлығын түсінсе, ұлттың биік рухы да жоғарылай түспек. Сол қадамға бастайтын ізгі амалдар – ұрпақ тәрбиесіндегі осындай басты міндеттердің жүзеге асырылуына негіз болмақ.  

«Айғақ-ақпарат»