Алтыншы шақырылымдағы Түркістан облыстық мәслихатының кезекті отыз жетінші сессиясы өтті. Кезекті сессияға Түркістан облысының әкімі Өмірзақ Шөкеев, облыстық мәслихат депутаттары, басқарма басшылары және БАҚ өкілдері қатысты. Айта кетейік, Түркістан облысының әкімі Өмірзақ Естайұлының жергілікті сессияға алғашқы қатысуы.
Депутаттардың назарына 28 мәселені қарау ұсынылған. Бүгінгі күн тәртібіндегі маңызды мәселенің бірі «Түркістан облысының басқару схемасын» бекіту. Облыста қолданыстағы 24 басқарма қайта құрылымдалды. 
Ең өзектісі Түркістан облыстық мәслихаттың шешімімен бұдан былай Түркістан облысының ішкі саясат басқармасы, Түркістан облысының дін істері басқармасы және Түркістан облысының отбасы, балалар және жастар істері жөніндегі басқармасы Түркістан облысының қоғамдық даму басқармасы болып құрылды. 
Ал Түркістан облысының кәсіпкерлік индустриалды-инновациялық даму басқармасы керісінше екіге бөлінді. Мәслихат депутаттарының бірауыздан мақұлдауымен Түркістан облысының кәсіпкерлік және сауда басқармасы, Түркістан облысының инвестиция және экспорт басқармасы болып қайта құрылымдалды.
Осыған дейін Түркістан облысының қолданыстағы басқармалар саны 24 болса, енді 23 басқарма.
Сессия барысында Түркістан облысының әкімі Өмірзақ Шөкеев бюджеттік кіріс бөлігін 2 есеге ұлғайту керектігін айтты. Сондай-ақ, Түркістан қаласын 5 бағытта дамытудың кешенді жоспары әзірленгендігін жеткізді. Алдағы уақытта рухани орталықта жалпы 89 нысанның құрылысы жүргізілмек.
«Айғақ-ақпарат».
