Шымкент қаласы Полиция департаментінің бастығы полиция полковнигі Ералы Мұсаәліұлы Жумаханбетов 2019 жылғы 3 сәуір күні №4 балалар үйіне арнайы барып, оның директоры Нұрсәуле Бегұлықызы Тастыбаевамен кездесіп, тәрбиеленушілерді қамқорлыққа алатынын жеткізді. Балалар үйінің тәрбиеленушілерінің жай-күйімен танысып қайтты.
№4 балалар үйі 1957 жылы құрылған жетім және ата-анасының қамқорлығынсыз қалған балаларға арналған №3 Сайрам мектеп-интернаты мемлекеттік мекемесі 1992 жылы жетім және ата-анасының қамқорлығынсыз қалған балаларға арналған №4 Сайрам балалар үйі ретінде қайта құрылды, 2014 жылы 24 қыркүйектен бастап Шымкент қаласы №4 балалар үйі коммуналдық мемлекеттік мекемесі болып тіркелді.
Балалар үйінің негізгі мақсаты — тәрбиеленушілердің жан-жақты дамуына қолайлы жағдай жасау, отбасына ұқсас үлгіде тәрбие беру, білім беру, мамандық таңдауға көмек көрсету және дербес өмірге дайындау болып табылады. Тәрбиеленушілер саны 92. 2017-2018 оқу жылындағы бітірушілер саны 17.
Шымкент қаласы Полиция департаментінің бастығы полиция полковнигі Е.Жумаханбетов аппараттық жиналыста №4 балалар үйінің тәрбиеленушілерін қамқорлыққа алу туралы ұсынысты тастаған еді. Полиция қызметкерлерінің жеке құрамы оны бірауыздан қолдаған болатын.