Түркістан төріндегі ізгілікті шара

Небәрі 20 жасында Олимпиада ойын­да­рының чемпионы атанып, көк туымызды Сидней көгінде желбіреткен Бекзат Саттархановтың есімі ұлықталды. Түркістан төріндегі «Бекзат» мөлтек ауданынының жастары дүйім жұртты жинап дәстүрлі Наурыз тойын өткізді. Сонымен қатар, әлеуметтік жағдайы төмен отбасыға көмек қолын созып, үлкен сауапты іс жасады. Бүгінде қазақ жастарының сауабы мол игі тірліктерді атқарып жатқандығы көңіл қуантады. Соның бірі «Бекзат» мөлтек ауданының 1988 жылғы тумалары. Өз қаржылары есебінен әлеуметтік жағдайы төмен отбасына баспана салып берді. Ұлық мерекеде ұлы іс атқарған жастарға өзінің алғысын білдіріп, Түркістан қаласының әкімі Әліпбек Өсербаевта арнайы келген. 4 баланы асырап отырған жалғыз басты ана Нұргүл Жақып екінші топтағы мүгедек. Жалдамалы пәтерде тұрып келген көп балалы анаға бұл баспана ерекше қуаныш сыйлады. Қуаныштан көз жасын жасыра алмаған ана елімізде осындай үлгілі жастарымыз көп болсын деген ізгі тілегін арнады. Мұнан соң игі бастама молшылыққа жайылған дастарханмен концерттік бағдарламаға ұласты. Дәстүрлі спорт ойындары, қазақша күрес, арқан тарту, қол күрес, гир көтеру, бокс, таэквандо, көкпар сынды түрлі шаралар ұйымдастырылып, ұлыстың ұлы күні ерекше ұлықталды. Жыл сайын дәстүрлі түрде ұйымдастырылып отыратын Наурыз мерекесі Бекзат Саттархановтың туған күні қарсаңында тойланып келеді.

Мерекелік шарада әуезді әнімен тұрғындарға көтеріңкі көңіл сыйлаған эстрада жұлдыздары мен айтыстың тарландары да жыр төкті. Бекзаттай арынды азаматқа арнаулар айтылып, рухына құран бағышталды. Бұл шараның думанды өтуіне  Түркістан облыстық «Нұр Отан» партиясының «Жас Отан» жастар қанаты қолдау танытып отыр. Батыр ұл Бекзатты тек қазақ қана емес бүкіл әлем таниды. Бес мемлекеттен арнайы келген спортшыларда бүгінгі шараның куәсі болып, Бекзаттай былғары қолғап шеберін үлгі тұтатындықтарын мақтанышпен жеткізді. Түркістаннан түлеп ұшқан Бекзат Саттарханов арамызда болса бүгінде 39 жасқа толатын. Әлемнің бірнеше дүркін чемпионы атанып, көк туымызды әлемдік аренада желбіретері сөзсіз еді. Әлемді мойындатқан қазақ ұлы халқының мәңгі жүрегінде.

«Айғақ-ақпарат»