Америка математика қоғамының жоғары дəрежелі «Мур» жəне ҚР Мемлекеттік сыйлықтарының иегері, физика-математика ғылымдарының докторы, профессор Өмірбаев Уəлбай Үтмаханбетұлы туған жерінде! Яғни, əлем ғалымдарын мойындатып 2001 жылы жапон математигі М.Нагатаның, 2004 жылы ағылшын математигі П.Конның есебін шешкен жерлесіміз 2007 жылдан бері АҚШ-тың Уейн Университетінде еңбек етеді.
Айта кетсек, белгілі математик Уəлбай Өмірбаев 1960 жылы 7 мамырда қазіргі Ордабасы ауданы, Төрткөл ауылында дүниеге келген. 1967 жылы осындағы орта мектептің табалдырығын аттап 1973-1977 жылдары Алматыдағы Республикалық физика-математика мектебінде білім алған азамат, Новосібір мемлекеттік университетінің механика-математика факультетін тəмамдаған.
Осы орайда, туған жерге келген есімі əлемге белгілі математикті жеплестері ерекше қошеметпен қарсы алды. Алдымен «Төрткөл» ЖОМ-нен бастау алған шара барысында Уəлбай Үтмаханбетұлы Өмірбаевтың атынан сайт және арнайы берілген математика сыныбының ашылу салтанаты өтті. Сонымен бірге, белгілі математиктің атынан мектепте жасөспірімдер арасында волейбол турнирі ұйымдастырылды.
Шарға жиналған ел азаматтары құттықтау сөз сөйледі. Əрмен қарай Уəлбай Үтмаханбетұлымен кездесу жергілікті мəдениет үйінде өз жалғасын тапты. «Ұлы даланың ұлы перзенті» тақырыбында өткен шара барысында мектеп оқушылары мен ауыл тұрғындары профессорға өз сауалдарын қойып жатты. Ал бұл танымдық тағылымға толы іс-шараларды ұйымдастыруға Түркістан облыстық білім басқармасы мен Ордабасы ауданының əкімдігі ұйытқы болып отыр.