Жерде бір бала қуанса, көкте мың періште шаттанады…

Еліміз бойынша оңалту орталығы тұңғыш рет Шымкент қаласында ашылған болатын. Бұрын Алматы, Астанаға барып ауруханалардың есігін тоздырған ата-аналар қазір мегаполиске ағылып жатыр. Себебі, бұл аймақта екі бірдей оңалту орталығы жұмыс істеп тұр. 14 жасқа дейінгі жасөспірімдерді қабылдап, 18 күн бойына ем беретін медициналық мекеменің бірі алғыс айту күні бүлдіршіндерді ерекше қуанышқа бөледі.

№1 оңалту орталығы неврологиялық дерті бар науқастарға арналған. Ғимарат 2018 жылдың алғашқы айында ашылған болатын. Мұнда неврология, физиотерапия, дефектология бөлімдері және дене шынықтыры мен нүктелі массаж сынды емнің түрлері көрсетіледі. Жалпы Түркістан облысы мен Шымкент қаласында жүйкесі бұзылған  3000-ға жуық сәби бар екен. Буыны әлі қатая қоймаған бүлдіршінді оңалту оңай. Сондықтан осындай мекемелерге қолдау білдіріп, көңіл бөлу керек.

Денсаулық сақтау мекемесі алғыс айту күні қарсаңында мерекелік шара ұйымдастырды. Тағдырдың жазғанына мойымай алға ұмтылып, ем алып жүрген балалар мұнда текке жатпайды екен. Қолының ебі барлар түрлі дүниені жасап, бос уақытты өткізбейтінін байқадық. Көрмеге өнерлерін қойып, түрлі ұлттың тағамдары насихатталды. Және дәл осы күні бірнеше балақайдың табаны жерге тиіп, өмірге қаз-қаз басты. Яғни, мегаполистегі №1 оңалту орталығы тұсаукесер рәсімін өткізді.

 «Жерде бір бала қуанса, көкте мың періште шаттанады» — дейді дана халқымыз. Расында оңалту орталығынан оңалып шығып жатқандарды көргенде бізде қуандық. Тәй-тәй басқан балақайлар үшін көңіліміз көтеріліп, аналардың алғысын естідік.

Оңалту орталығында басына түскен дертті жеңуге тырысып жүрген бала мен ананы көрген біз өз өмірімізге шүкірлік еттік. Жаратқанға рахмет айтып, алғыс айту күнінің маңызын басқа қырынан ұғындық. Адамдарға алғыс білдіру – имандылықтың белгісі екенін сізде ұмытпаңыз.

«Айғақ-ақпарат».