Мегаполис мэрі қала тұрғындарының алдында қорытынды есеп беруде

Ел Президенті Нұрсұлтан Назарбаев Шымкентке Республикалық маңызы бар мәртебе берген соң, қалада біршама өзгерістер орын ала бастады. Миллионды қала күн санап даму үстінде. Осы ретте Шымкенттің әкімі Ғабидолла Әбдіраxымов қалада 2018 жылы атқарылған жұмыстардың көрсеткіштерімен таныстыру жиынын өткізіп отыр. Жалпы экономикалық өсім — талдауға сәйкес 7,6 пайызды құраса, өндіріс көлемі 1,3 трлн. теңгеден асқан. 2018 жылы қала экономикасына 582,1 млрд теңге инвестиция тартылып, бұл көрсеткіш бойынша Шымкент — республикада алдыңғы орынға шықты. Сондай-ақ, 17 367 жаңа жұмыс орындары ашылып, жұмыссыздық деңгейі 5,2 пайыздан 5,1 пайызға төмендеген.Өнеркәсіп саласына тоқталсақ. 2018 жылдың қорытындысымен өнім көлемі 476,7 млрд. теңгені құрап, 2017 жылмен салыстырғанда 4,5 пайызға артқан. Шымкент қаласының инвестициялық аxуалын және әлеуетін көтеру, шағын және орта бизнесті дамыту және қолайлы жағдай жасау үшін «Оңтүстік» арнайы экономикалық аймағының жұмыс істеп отырғандығы мәлім. Бүгінде мұнда іске асырылған жобалардың жалпы саны 63-ке жеткен. 41,9 млрд. теңге инвестиция тартылып, 4 мыңнан астам жұмыс орны ашылған. Алдағы міндет қаланың индустриалды аймақтарында 114,3 млрд теңгеге 117 жобаны іске асырып, 7 мыңнан астам жұмыс орнын құру жоспарлануда.Есепті жылы 439 мың шаршы метр тұрғын үй пайдалануға беріліп, 2017 жылмен салыстырғанда өсім 9% құраған. Одан бөлек, «7-20-25» бағдарламасы аясында 114 азаматқа 1,1 млрд. теңге несие берілген.

«Айғақ-ақпарат».