Орта ғасырдағы Отырардың даму концепциясы талқылануда

Бүгін ҚР Парламенті Мəжілісінің депутаттары, əлеуметтік-мəдени даму комитетінің мүшелері Түркістан облысына арнайы іс-сапармен келді. Елбасы «Ұлы даланың жеті қыры» мақаласында «Орта ғасыр­дағы Отырар қаласы әлемдік өркениеттің ұлы ойшылдарының бірі – Әбу Насыр әл-Фарабиді дүниеге әкелсе, түркі ха­лық­тарының рухани көшбасшыларының бірі Қожа Ахмет Яссауи Түркістан қала­сын­да өмір сүріп, ілім таратқан» деп ежелгі Отырар туралы ерекше атап өткен болатын. Бүгінде Елбасы тапсырмасын орындау мақсатында ескі қалашықтың даму концепциясын талқылап, жоспар жасауды мақсат еткен бір топ мәжілісмендер ауданның тарихи орындарын аралап жүр.

            Айта кетейік, жұмысшы топ құрамында Мәжілістегі əлеуметтік-мəдени даму комитетінің хатшысы Бейбіт Мамыраев бастаған  халық қалаулылары Сауытбек Әбдірахманов, Кеңес Абсатиров, Зәуреш Аманжолова, Әбдіманап Бектұрғанов, Фахриддин Қаратаев, Кәрібай Мұсырман, Айгүл Нұркина, Жәмила Нұрманбетова, Бақытбек Смағұл, Аяулы Әлиевалар және Қазақстан Республикасының Мәдениет және спорт вице-министрі Ақтоты Райымқұлова сынды министрлік өкілдері бар. Сондай-ақ, елімізге белгілі археолог, реставраторлар Жәкен Таймағанбетов, Қырым Алтынбековтер де келді.

 Отырар ауданының әкімі Ерлан Айтаханов Мәжіліс депутаттары мен министрлік өкілдерін ауданның шекарасынан күтіп алып, алдымен Отырар мемлекеттік мəдени-қорық музейімен таныстырды.

Қазіргі таңда Арыстанбаб кесенесі мен Оты­рар төбе қалашығына дейін­гі 1,7 шақырым аралықты сер­вистік орталық салу, демалыс аймағын жасау, абаттандыру көгалдандыру жобасы қолға алынып жатыр.

Мемлекет басшысы «Болашаққа бағдар: рухани жаңғыру» атты бағдарламалық мақаласында «Біз ХХІ ғасырдың жаһандық картасында ешкімге ұқсамайтын, дербес орны бар ұлт боламыз десек, «Жаһандағы заманауи қазақстандық мәдениет» жобасын іске асыруға тиіспіз. Әлем бізді қара алтынмен немесе сыртқы саясаттағы ірі бастамаларымызбен ғана емес, мәдени жетістіктерімізбен де тануы керек» деген болатын. Міне, сол бағыттағы алғышарттардың реті Отырарда орындалып жатыр.

«Айғақ-ақпарат»