Сарыағашта бір күнде 13 нысан іске қосылды

Саялы Сарыағашта бір күнде 13 нысан іске қосылды. Үш ауысымды мектептің саны қысқарып, доңыз жылының алғашқы айында су жаңа білім ордасы жұмысын бастады. Халқы тығыз орналасқан аймақта медициналық мекеме де жетіспейтін. Жергілікті бюджеттің қаражатына салынған медициналық тірек те пайдалануға берілді. Аудан басшысы Қайрат Әбдуәлиев таң қылаң бере әуелі балабақша лентасын қиып, бүлдіршіндерді кеудесіне қысты. Тұлымшағы желбіреген балақайлардың жайдарлы күлкісі әкімге шабыт сыйлап, жұмысына серпіліспен кірісті.  Рухани жаңғыру дегеніміз — тарихты ұмытпау, асылдарымызға құрмет көрсету. Сарыағаш қаласы доңыз жылын осылайша, жағымды жаңалықтан бастап отыр. Қапланбек оқу шаруашылығында «Ер есімі – ел есінде» аллеясын салтанатты түрде ашып, 1941-1945 жылдары ерлік көрсеткен жауынгерлердің рухына құран бағыштады.

Бұл маңнан соғысқа 43 азамат аттанған екен. Көпшілігі майданда мерт болыпты. Ресей елінің топырағында жатқан ерлер қанша ма? Соның бірі Сталинград шайқасына қатысып, ерлік жолында дәм тұзы таусылған солдат. Қан майданның даласына жерленген жауынгердің жатқан жерінен бір уыс топырақ осы аллеяға жеткізіліпті. Батырларға көрсетілген құрмет — жиналған қауымның ет-жүрегін елжіретіп, көзіне жас үйірді.

Дәл осы аллеяның жанынан 900 орынға арналған мектеп салыныпты. 2017 жылдың қараша айында басталған құрылыс жұмыстары биылға дейін жалғасқан. №4 Юрий Гагарин атындағы білім ордасының ұжымы және оқушылары бұған дейін ескірген ескі ғимаратты паналап, төзімділік танытқан. Сол шыдамдылық шын қуанышқа жеткізді.

Мектеп — білім айдынындағы үлкен кеме тәрізді. Қызықты сәттердің көбісі алтын ұяның табалдырығында. Онда таудай болып шығасың. Сондықтан тәрбие мен білімнің мекеніне көп көңіл бөлінсе орынды. Қаншама түлектердің қанатын қатайтып ұшырған білім ордасының ұжымы су жаңа ғимаратқа көшіп, көңілдері жайланды. Осылайша, Сарыағашта үш ауысымды мектептердің саны тағы да кеми түсті.

Сарыағаш ауданындағы Тегісшіл ауылдық округінде де мектеп ескірген. Қазақ поэзиясындағы ірі өкілдердің бірі Мағжан Жұмабаевтың есімін иеленген білім ұясы алақандай ауылдағы ағайынға қуаныш сыйлады. Өйткені, мұндағы әрбір жанұяның баласы, енді бірінің немересі осында білім алып жүр. Тұрғындардың кем дегенде 30 пайызы мектепте жұмыс істейді. Мекеме басшысына кілт табысталып, лента қиылған соң жұртшылық ғимараттың ішкі тынысымен танысып шықты. Заманның талабына сай салынған білім ошағы көпшіліктің көңілін жадыратты. Бұл — елімізде жағдайдың жақсарғанын білдіреді. Қолда барға қанағат етіп, шүкір етуге мүмкіндік.

300 орынға шақталған мектеп Тегісшілден текті ұрпақты тәрбиелейтін басты мекеме. Екі жыл бойы құрылысы жүрген шақта оқушылар маңайында қызыға асыр салған. Тар сыныпта тынысы тарылғандар кең ғимаратқа келіп көсілді.

Жас ұрпаққа білім, тәрбие беретін мекеменің жаңарғаны жақсы. Бірақ денсаулық – бұл әр адамның ғана емес, бүкіл қоғамның құнсыз күйі. Сарыағаштағы Тегісшіл ауылдық округінің ағайыны бір күнде қос қуанышқа куә болды. Тәуелсіздік алғанымызға 30 жылға жуықтады. Осы уақыттың аралығында әлеуеті дамыған аймақ медициналық тірекке жарымаған. Енді басы ауырып, балтыры сыздай қалса білікті дәрігерлер тұрғындарға тегін медициналық көмек көрсетуге әзір. Бұл үшін жаңа ғимарат салынып, іші қажетті құрал-жабдықтармен толықты. Осылайша сарыағаштықтардың жұдырықтай жүректері дүрсілдеп, көңілдері шаттанды. Түркістан облысы бойынша әлеуеті жақсы ауданның қатарындағы Сарыағаш осылайша бір күнде 13 нысанды іске қосып, әлеуметтік нысандардың мәселесін шешіп жатқанын байқатты.

Бағлан Байкөбекқызы