— Алтыншы шақырылымдағы Түркістан облыстық мәслихатының отыз үшінші сессиясы өтті. Күн тәртібінде 21 мәселе қаралса олардың негізгісі 2018-2020 жылдарға арналған облыс бюджетіне өзгерістер мен толықтырулар енгізу болатын. Ал, бюджетке қатысты өзгерістер барысын бұған дейінгі тұрақты комиссия отырыстарында әбден таразы талқысына салған халық қалаулылары бұл жолы мәселені ұзақ талқылап жатпады. Яғни, шешімді жобасына сай бекітіп берді.
— Түркістандық этнос «Менің елім – Қазақстан» атты ән фестивалінде сынға түсті. Тәуелсіздік күнінің қарсаңында ұйымдастырылған бұл байқауға 19 үміткер қатысып отыр. Тек патриоттық әндер орындалатын фестиваль осымен төртінші жыл дәстүрлі өткізіліп келеді.
— Ел тәуелсіздігіне биыл — 27 жыл. Осындай мемлекеттік маңызы бар мереке еліміздің әр өңірінде кең көлемде тойлануда. Ордабасы ауданы Шоқан Уәлиханов атындағы жалпы орта мектебінде мерекелік іс-шара ұйымдастырылған болатын. Оқушылардың қатысуымен өткен концерттік бағдарлама жастарға патриоттық сезім мен рухани азық сыйлады.
— Тәуелсіздік мерекесіне орай «Нұр Отан» партиясы Шымкент қалалық филиалы қатарындағы нұротандықтармен бас қосты. Онда республикалық «Ең үздік бастауыш партия ұйымы» байқауының Шымкент қаласы бойынша үздіктері марапатталды. Сондай-ақ, бұл бас қосуда арнайы іріктеуден өткен түрлі сала мамандарын партия құрамына салтанатты түрде қабылдады.
— Төлеген Тәжібаев атындағы №47 мектеп – гимназиясының қабырғасында бүгін ұрпақтар сабақтастығы жалғасты. Тәуелсіздік күніне орай ОҚМПУ ұстаздарымен бірлескен салтанатты жиын өтті. Басты мақсат – оқушылардың бойынан ұлттық рухты оятып, өткен тарихты жаңғырту.
— Шымкентте екі айлық нәресте ұнтақ сүт ішіп, уланды деп ақпарат таратылған болатын. Бірақ бұл жалған болып шықты. Естеріңізге сала кетейік, желтоқсан айынының алғашқы аптасында сәбиге «Хумана» балаларға арналған қоспасын берген ата-ана арызданып, ауруханадаға баласы үшін құрақ ұшқан еді. Ананы да, баланы да тексерген ақ халаттылар нәрестенің асқазанынан сынама тапты. Қауіпті зат қоспа тамақтан келген деп ата-ана шағымданды. Осыдан соң жауапты мамандар Германияда өндірілетін белгілі брендтке қатысты тексеру жүргізіп, нәтижесін бүгін жариялап отыр. БАҚ өкілдеріне ұйымдастырылған брифингке медицина саласындағы біліктілер мен «Хумана» компаниясының өкілдері келіп қатысты. Сонымен қатар екі айлық нәрестенің әкесі де келіп, ұнтақ сүтке қатысты асығыс шешім айтқаны үшін компания өкілдерінен кешірім сұрады.
