Жаңалықтар. 24 қараша, 2018 жыл.

— Елбасымыз  Бүкілресейлік мемлекеттік телевизиялық және радио хабарларын тарату компаниясының телеарналарына сұхбат берді. Тілші сауалдарына орай, Нұрсұлтан Назарбаев күн тәртібіндегі негізгі халықаралық және өңірлік мәселелерге тоқталып, Қазақстан мен Ресей арасындағы ынтымақтастықтың басым бағыттары туралы әңгімеледі. Сұхбат барысында Қазақстан Президенті «Нұрлы жол» инфрақұрылымды дамытудың мемлекеттік бағдарламасының негізгі нәтижелері жөнінде айтып, Еуразия экономикалық ынтымақтастық одағы мен «Бір белдеу, бір жол» бастамасын тоғыстырудың артықшылықтарына арнайы тоқталды. Сонымен қатар, Мемлекет басшысы бірқатар жеке сұрақтарға жауап беріп, жаһандық тәртіптің одан әрі дамуының перспективаларына қатысты өз ойын ортаға салды. Сұхбатты биылғы желтоқсан айының басында «Россия-1» және «Россия-24» телеарналары арқылы көрсету жоспарланған.

— 23 қараша күні «Ағабек Қарабеков» қайырымдылық қорының ұйытқы болуымен, облыстық балалар ауруханасының келісімімен еліміздің бас ортопеді балаларға ота жасады. Медицина ғылымдарының кандидаты өзінің практикалық дағдыларымен бөлісіп, облыстық балалар ауруханасының дәрігерлері біліктілігін арттырды. Сондай-ақ «Ағабек Қарабеков» атындағы оңалту орталығынды ортопедия ауруларымен науқастанған балаларды қабылдады.

 – Биыл Түркістан облысына қарасты аудан қалалар арасында өткен ауыл шаруашылығы еңбеккерлерінің қорытынды «Агрофэст 2018»  фестивалінде Шардара ауданы көш басынан көрінді.  Яғни облыстан берілген индикаторлық көрсеткіштерді жоғары денгейде  орындап шыққан ауданға облыс әкімі Жансейіт Түймебаев салтанатты түрде арнайы сертификатты табыс еткен болатын. Ірі қара мал басын асылдандыру бойынша да озат аудан атанып, мемлекеттік бағдарламаларды орындауда үздік шыққан аймақтың жетістіктеріне жергілікті шаруалардың қосқан үлестері мол.

— Бәйдібек ауданының Шаян ауылындағы С.Әбжаппаров атындағы мектеп-интернатында IT кабинет ашылды. Мұндағы мақсат 8 жастан 16 жасқа дейінгі жеткіншектерді тың идеялар мен жаңа ізденістерге жетелеу, даңғыл жол ашу. Игі бастамаға аудан басшылығы да қатысып, өз ризашылықтарын білдірді.

— Бәйдібек ауданында орналасқан Комсомол  ЖОМ–нің атауы қайта жаңартылды. 9 қараша күні аудан әкімі Бақытбек Танагөзовтың  қаулысымен мектепке «Қаратау» аты берілді.   Жаңа ғимаратқа көшкеніне 3 жыл болған білім ордасы бүгінде мультемидиялық сыныптармен  толыққан.