ҚР Инвестициялар және даму министрі Жеңіс Қасымбек баспананы пайдалануға беру бойынша алғашқы орындардан көрінген өңірлерді атады, деп хабарлайды ҚазАқпарат.
«10 айдың қорытындысы бойынша құрылысы жүргізілген үйлердің 9,8 млн шаршы метрі пайдалануға берілген. Бұл көрсеткіш 2017 жылдың алғашқы 10 айымен салыстырғанда 111,6 пайызға артық. Жылдық жоспармен есептегенде пайдалануға беру ауқымының 81 пайызы орындалып қойды. Жыл соңына дейін 12,1 млн шаршы метр үй өз иесін табады», — дейді Жеңіс Қасымбек.
Министрдің айтуынша, республикада жалпы 85 990 тұрғын үй, онымен бірге 30 704 жеке үй өткізіліп қойған.
«Тұрғын үйді пайдалануға беру бойынша өсім еліміздің 14 өңірінде жалғасып жатыр», — деді Жеңіс Қасымбек.
ҚР Инвестициялар және даму министрлігінң мәліметіне сүйенсек, үйді пайдалануға беру жағынан Жамбыл (141,5%), Маңғыстау (139,7%) облыстары, Шымкент қаласы (135,2%), Алматы (130,3%), Түркістан (121,1%), Батыс Қазақстан (119,9%) және Ақтөбе (119,3%) облыстары көш басына шыққан.
Ал бұл ретте төмен көрсеткішті Қызылорда (92,6%), Павлодар (95,9%) облыстары мен Астана (92,9%) қаласы көрсетіп отыр.
