Тараз қаласы тарихи оқиғаларға бай көне қалалардың бірі. Тарихы мол қала бүгінде Жамбыл облысының орталығы. Қойнауы қазынаға толы шаһар бұл.
Тасын түртсең тарихы сөйлейтін бұл қаланың бүгін «Қала күні» мерекесі тойлануда. Думандатып тойланып жатқан мереке қарсаңында 20 нысанның тұсауы кесілуде. Соның бірі, мерекеге орай облыс әкімдігі ғимаратының алдында жыр алыбы — Жамбыл Жабаевтың ескерткішінің ашылу рәсімі өтті.
Тарих пен дастанға, шежіре мен аңызға толы, тоғыз жолдың тоғыстырған киелі Тараз өлкесінен талай танымал тұлғалар шыққан. Солардың ішінде Жамбыл Жабаевтың орны ерекше. Облыстың есімін еншілеп жатқан жыр алыбына арналған ескерткіш қаланың ең бір маңызды, көрнекті жерінен бой көтеруі тағылымды іс.
Елбасымыз Нұрсұлтан Назарбаевтың «Болашаққа бағдар: рухани жаңғыру» атты мақаласында «Ұлттық салт-дәстүрлеріміз, тіліміз бен музыкамыз, әдебиетіміз, жоралғыларымыз, бір сөзбен айтқанда ұлттық рухымыз бойымызда мәңгі қалуға тиіс. Абайдың даналығы, Әуезовтің ғұламалығы, Жамбылдың жырлары мен Құрманғазының күйлері, ғасырлар қойнауынан жеткен бабалар үні — бұлар біздің рухани мәдениетіміздің бір парасы ғана» — деп атап өткен болатын.
«Туған жер» жобасы және «Рухани қазына» бағдарламасы аясында Тараздың төрінен орын алған, Жамбыл Жабаев ескерткішінің ашылуына Тараз облыстық Қоғамдық Кеңесінің төрағасы Жандар Кәрібайұлы мен Қазақстан Республикасының Мәдениет қайраткері Әлібек Әмзеұлы қатысты.
Олар Жамбыл — қазақтың ақындық өнерінің қазанында қайнап, ежелгі ауыз әдебиетінің кәусарымен сусындап, ақындық, жыраулық дәстүрдің ХХ ғасырдағы туын биікке көтерген ұлы жырау екендігін, еңселі ескерткіштің облыс орталығынан орын алғаны ғибратты іс болғанын тілге тиек етті.
«Айғақ-ақпарат».
