Бесінші қазан күні жарияланған мемлекет басшысының Жолдауы бойынша Түркістан облысы активінің кеңейтілген мәжілісі өтті. «Қазақстандықтардың әл-ауқатының өсуі: табыс пен тұрмыс сапасын арттыру» тақырыбындағы мән маңызы зор биылғы Жолдау жүктеген міндеттер кеңінен сөз болған жиында бірқатар баяндамалар жасалды. Елімізді әрмен қарай дамыту жолында Елбасы ұсынып отырған негізгі 6 бағыт берік экономикалық негіз қалыптастыра отырып, Қазақстандықтардың әл-ауқатын жақсарту мақсатын көздейді.
Елбасының биылғы 6 негізгі бағыттан тұратын жолдауы аясындағы облыс активінің кеңейтілген мәжілісі Түркістан қаласындағы Қ.А.Яссауи атындағы ХҚТУ-нің мәдениет орталығында өтті. Аудан қала әкімдері мен салалық басқарма басшылары, мәслихат депутаттары зиялы қауым және қоғамдық ұйым өкілдері қатысқан жиынды облыс әкімі Жансейіт Түймебаев ашып жүргізді.
Айта кету керек, биылғы Жолдаудың алғашқы бағыты ретінде мемлекет басшысы халық табысын өсіруге басымдық берді. Яғни, Үкіметке 2019 жылдың 1 қаңтарынан бастап ең төменгі жалақыны 1,5 есе, яғни 28 мыңнан 42 мыңға дейін өсіруді тапсырды. Ал, бұл барлық сала бойынша түрлі меншік нысандарындағы кәсіпорындарда жұмыс істейтін 1 миллион 300 мың адамның еңбекақысын тікелей қамтиды. Сондай-ақ, бюджеттік мекемелерде жұмыс істейтін 275 мың қызметкердің еңбекақысы көбейіп, орта есеппен 35 пайызға өседі. Елбасы ұсынған осы және өзге де негізгі бағыттардың маңыздылығы төңірегінде жиын барысында бірқатар азаматтар баяндама жасады.
Сонымен бірге, Мемлекет басшысы биылғы Жолдауында Агроөнеркәсіп кешенінің әлеуетін толық іске асыру қажеттігіне тоқталды. Яғни, негізгі міндет – еңбек өнімділігін және қайта өңделген ауыл шаруашылығы өнімінің экспортын 2022 жылға қарай 2,5 есе көбейту қажеттігін атап айтты. Бұл ретте Елбасы Жолдау барысында Түркістан облысындағы «Бөрте милка» кәсіпорнының жұмысын үлгі ретінде атап өткен болатын. Сондықтан мәжілісте аталмыш серіктестік құрылтайшысы Нұралы Әбішев те сөз сөйлеп, зауыттың бүгінгі жұмыс барысына тоқталды.
Мемлекет басшысы Жолдауда келесі жылы «Педагог мәртебесі туралы» заңды әзірлеп, қабылдау қажеттігін тапсырды. Бұл құжат мұғалімдер мен мектепке дейінгі мекеме қызметкерлері үшін барлық игілікті қарастырып, жүктемені азайтуға, жөнсіз тексерістер мен міндеттен тыс функциялардан арашалауға тиіс.
Жолдауда айтылған тағы бір басым бағыт халықтың тұрмыс сапасын арттыру. Білім берудің, денсаулық сақтау саласының, тұрғын үйдің сапасы мен қолжетімділігі, жайлы және қауіпсіз жағдайда өмір сүру мәселелері әрбір қазақстандық отбасына қатысты. Осыған орай, Үкімет әлеуметтік секторға, қауіпсіздік пен инфрақұрылымға мән бере отырып, бюджет шығыстарының басымдықтарын қайта қарауы тиіс екендігін атап өткен болатын.
Ал, мәжіліс соңында сөз алған облыс әкімі Жансейіт Түймебаев негізгі алты бағыттан тұратын саяси құжаттың мәні мен мағынасына жеке-жеке тоқталып, оның қазақстандықтардың табысын арттыруға, әлеуметтік жағдайын жақсартуға, шағын және орта кәсіпкерлікті одан әрі дамытуға, халықтың өмір сүруіне қолайлы әрі қауіпсіз қоғамдық орта құруға бағытталғанын жеткізді. Сонымен бірге, аймақ басшысы жолдауда айтылған ел экономикасын алға сүйрейтін индустрияландыру, өнеркәсіп, құрылыс, тұрғын үй, туризм агроөнеркәсіп сынды салаларды дамытудың өңіріміз үшін маңызы зор екендігіне тоқталды.
Халқымыздың бақуатты өмір сүруі және еліміздің озық дамыған 30 елдің қатарына қосылуы – Тәуелсіз мемлекетіміздің мәңгілік мұраты. Бірлігіміз мызғымаса, ынтымағымыз ыдырамаса, біз үшін алынбайтын асу, бағынбайтын белес болмайды. Елбасы айтқан осындай орамды ойлар мен оңды бастамаларды жүзеге асыруда облыс жұртшылығын бірлесе жұмыс жасауға шақырған облыс әкімі жолдауда айтылған тағы бір мәселе мемлекеттік мекемелердегі жиналыстарды азайту қажеттігін де атап өтті.
Қазақстанның бағындыратын биіктері әлі алда. Осы жолда халық сенімі рухымызды жігерлендіріп, бойымызға күш-қайрат дарытады.Сол сенімді ақтаудан артық мұрат жоқ! Елбасының Жолдауда айтқан осы бір қанатты сөздерін келтіріп жұмыла жұмыс жасауға шақырған Жансейіт Қансейітұлы мәжілісті осылайша қорытты.
Абай Омар.
