Ленгір қаласының іргесі 19 ғасырдың 70 жылдарында көмір өндіретін шағын кенші қала ретінде қаланған. 1945 жылы Төлеби ауданының орталығы ретінде қала статусына ие болды. Кейбір тарих беттерінде Ленгір ғұлама ғалымдар мен билердің әулиелердің мекен еткен жері екендігі айтылды. Өскен ел тарихын тасқа қашап жазады. Қазақ даласының қай тасын түртсеңде тарих. Бүгінде қаншама қиын қыстау күндерді бастан өткеріп, ҰОС жылдарында көмірмен қамтамасыз еткен кенді қалаға 73 толды. Осыған орай ұйымдастырылған салтанатты шарада аудан әкімі қала тұрғындарына өзінің құттықтауын жеткізді.
Тұрғындарды қала күнімен құттықтаған аудан әкімі жергілікті жердің өсіп өркендеуіне өз үлесін қосып жүрген бірқатар ел ағаларына алғыс хаттар табыстады. Мұнан соң мерейтой қарсаңында қала қонақтары үшін қызмет ететін «Ленгер Сити» атауымен жаңа таксопарктың тұсауы кесілді.
30 мыңға жуық тұрғыны бар Ленгір қаласында келер жылы 10 көпқабатты тұрғын үй салу жоспарланып отыр. Осылай деп мәлімдеген аудандық мәслихаттың хатшысы шара барысында бірқатар ел ағаларын арнайы құрмет грамотасымен марапаттады.
Мемлекет басшысының «Болашаққа бағдар: рухани жаңғыру» атты халыққа арнаған Жолдауында салт-дәстүрімізді сақтай отырып ұлттық кодқа мән беру керектігі айтылған. Елбасы Жолдауын ұстанған аудан басшылығы қала күніне орай жастар арасында ұлттық ойындар ұйымдастырып жеңімпаздарға арнайы сый-сыяпаттар табысталды.
Қала күнінде көмейінен жыр төгілген әншілер әуелете ән шырқаса, қолынан бал тамған аспазшылар палау пісіруден жарыс өткізді. Ал, ұстаздар қауымы мен оқушылар түрлі қол өнер бұйымдарынан көрме ұйымдастырған. Бұл күні қала тұрғындарының жүздері нұрға көңілдері қуанышқа толы болды.
